Accessibility links

Донецк облысында украиналық екі әскери қаза тапқан


Ресейшіл сепаратист пен ЕҚЫҰ бақылаушысы бүлінген көлік жанында тұр. Широкино селосы, 30 наурыз 2015 жыл. (Көрнекі сурет)
Ресейшіл сепаратист пен ЕҚЫҰ бақылаушысы бүлінген көлік жанында тұр. Широкино селосы, 30 наурыз 2015 жыл. (Көрнекі сурет)

Украинаның Донецк облысындағы Широкино селосы маңында бүгін танкіге қарсы мина жарылысынан автокөлікте келе жатқан украиналық екі әскери қаза тауып, біреуі жараланған. Бұл туралы президент әкімшілігінің арнайы операциялар жөніндегі баспасөз хатшысы Александр Мотузяник «112 Украина» телеарнасына хабарлаған. Оның сөзінше, украиналық әскерилер Широкинодағы жаяу әскер батальондарының бірінің қызметкерлері.

Бұған дейін Луганск облысындағы Счастье қаласы маңында украиналық әскерилер мінген автокөлік минаға түсіп, төрт адам қаза тапқан деген ақпарат тараған. Кейін террорға қарсы орталықтан бұл жарылыс минадан емес, танкіге қарсы зымыранмен атудан болған деп хабарлады.

Мотузяниктің ақпараты бойынша, тәулік барысында Мариуполь ауданында сепаратистер әуеден барлау жүргізуге жіберген жеті пилотсыз ұшатын аппарат байқалған. Ол сепаратистерді "оқ атпау режимін бұзған" деп айыптады. Әсіресе, Донецк маңы мен Луганск облысындағы Сокольники кенті маңында ондай оқиғалар жиі тіркелген, ол аймақтарда сепаратистер қолдануға тыйым салынған 120-миллиметрлік минометтерден атқылаған деп мәлімдеген Мотузяник.

XS
SM
MD
LG