Сенбіге қараған түннен бастап Польшада президент сайлауының екінші кезеңіне дауыс берер алдындағы «тыныштық күні» күшіне енді. Бүгін Польшада кандидаттар мен оларды қолдаушыларға кез келген үгіт-насихат шараларын жүргізуге, қоғамдық сауалнама деректерін жариялауға тыйым салынады.
Жұма күні кешке әлеуметтік зерттеу нәтижесі сайлауға түсіп жатқан оппозициялық «Құқық және әділеттілік» партиясының өкілі Анджей Дуда саяси бәсекелесі – қазіргі ел президенті Бронислав Коморовскийден жарты пайыз ғана артық қолдауға ие болып тұрғанын көрсеткен.
10 мамырдағы президент сайлауының алғашқы кезеңінің нәтижесі бойынша, сайлаушылардың 33,8 пайызы Коморовскийді қолдап, 34,8 пайызы - Дуданы жақтаған.
Парламенттік билік жүйесі орныққан Польшада президент негізінен өкілеттік қызметтер атқарады. Биыл Польшада парламент сайлауы күз мезгілінде өтуі тиіс.