Наурыз айынан бері Йемендегі қарулы қақтығыстан 398 бала мерт болып, 600 бала жарақат алса, 377 бала түрлі террорлық топтардың қатарына қосылған. Бұл туралы БҰҰ балалар қоры – ЮНИСЕФ мәлімдеді.
ЮНИСЕФ есебінде Йемендегі қақтығыстар салдарынан 1,3 миллион бала үйін тастап босып кеткені айтылған.
Йемендегі қақтығыстан барлығы 4300 адам мерт болған. Олардың көбі – бейбіт тұрғындар.
Наурызда Сауд Арабиясы мен сүнниттік араб елдері Йеменде астанасы Сананы басып алған шиит хуситтеріне қарсы әуе шабуылдарын бастаған. Хуситтер ел президенті Абд-Раббу Мансур Хадиді елден кетуге мәжбүр еткен еді.
Йеменнің көпшілік бөлігін бақылауда ұстап тұрған хуситтер қарамағындағы территорияларды босату талаптарына мойынсұнбай отыр.
