Қазақстандық жеңіл атлет Ольга Рыпакова Дохада өткен Бриллиант лигасының алғашқы кезеңінде қола медаль иеленді.
Үш қарғып секіру бәсекесінде Рыпакованың көрсеткіші 14,61 метр болды. Алтынды колумбиялық Катерин Ибаргуэин (15.04 м) жеңіп алса, күмісті венесуэлалық Улимар Рохас (14,92 м) иеленді.
Ольга Рыпакова 2012 жылы Лондонда өткен олимпиада ойындарының жеңімпазы. Ол биыл Риода өтетін олимпиадаға да қатысады.
Бриллиант лигасы - IAAF (Халықаралық жеңіл атлетика федерациясы) ұйымдастыратын бірнеше кезеңнен тұратын коммерциялық жарыс. Бұл сынның келесі кезеңі 14 мамырда Шанхайда өтеді.
