Ақтөбедегі шабуылдардан соң Қазақстан әуежайларында қауіпсіздік шаралары күшейтілді деп хабарлады азаматтық авиация комитетінің басшысы Бекен Сейдахметовке сілтеме жасаған Tengrinews.kz сайты.
Сейдахметовтің сөзінше, Қазақстанда террорлық қауіп-қатердің "сары деңгейі" жариялануына байланысты әуежайларда қосымша тексеру жүргізіледі. Комитет басшысы жолаушыларды қосымша тексеруден бөгелмес үшін әуежайға ертерек келуді сұраған.
Өткен жексенбіде Ақтөбеде белгісіз адамдар екі қару-жарақ дүкенін тонап, әскери бөлімге шабуылдаған. Ресми мәлімет бойынша, шабуыл мен атыстан барлығы 21 адам мерт болды. Олардың 13-і - шабуыл жасады деген күдіктілер, сегізі - бейбіт тұрғындар. Қазақстан билігі шабуыл жасағандар "радикалды діни топ жақтастары" болуы мүмкін дейді.
Шабуылдан соң Ақтөбеде террорлық қауіп-қатердің ең жоғарғы "қызыл сызығы" деңгейі жарияланған. Ал 6 маусымда Қазақастанда 40 күн мерзімге террорлық қауіп-қатердің "сары деңгейі" жарияланған.
