Үш қарғып секіруден қазақстандық Ольга Рыпакова Рио олимпиадасында қола медаль алды. Ол 14,74 метрге секірді. Алтынды колумбиялық Катерин Ибаргуэн (15,17), күмісті венесуэлалық Юлимар Рохас (14,98) иеленді.
2012 жылғы Лондондағы олимпиадада Рыпакова алтын, Ибаргуэн күміс алған.
Қазірге дейін Қазақстан құрамасы Рио олимпиадасында екі алтын, екі күміс, төрт қола медаль иеленді. Бұған дейін ауыр атлетикадан Нижат Рахимов пен жүзуден Дмитрий Баландин алтын алған. Жазира Жаппарқұл (ауыр атлетика) мен Елдос Сметов (дзюдо) күміс медаль еншілеген. Галбадрах Отгонцэцэг (дзюдо), Карина Горичева мен Фархад Харки (екеуі де - ауыр атлетика) қола медаль иеленген. Қазақстан 14 тамыздағы командалық есепте 16-орында тұр.
