Accessibility links

Маңғыстауда Жаңаөзен оқиғасы құрбандарын еске алды


2011 жылғы Жаңаөзен оқиғасы құрбандарын еске алу шарасына жиналғандар. Теңге ауылы, Маңғыстау облысы, 10 желтоқсан 2016 жыл.

Маңғыстау облысы Жаңаөзен қаласы маңындағы Теңге ауылында бүгін 2011 жылғы желтоқсанда мұнайшылардың наразылық жиынын күшпен тарату кезінде қаза болған құрбандарды еске алу шарасына жүздеген адам қатысты. Теңге ауылы маңында Жаңаөзен оқиғасы құрбандары жерленген зират бар.

Жаңаөзен құрбандарын еске алу шарасын «Өзенмұнайгаз» акционерлік қоғамы құрамындағы «Бұрғылау-жөндеу басқармасы» кәсіпорны ұжымы ұйымдастырған.

Еске алу шарасына Жаңаөзен қаласында 2011 жылы желтоқсанның 16-сы күні бірнеше айға жалғасқан мұнайшылар ереуілін күшпен тарату кезінде қару оғынан қаза тапқандардың туған-туыстары да қатысты. Ұйымдастырушылардың бірі белсенді Нұрлыбек Нұрғалиевтің айтуынша, еске алу асына кәсіподақ ұйымы екі жарым миллион теңге бөлген.

«Жаңаөзендегі тәртіпсіздіктерге» қатысқан деген айып бойынша сотталып, түрмеде отырып шыққан мұнайшылар белсендісі Шабдол Өткелов наразылықты күшпен басу кезінде қаза тапқандардың туыс-туғандарын жұма күні арнайы жеке шақырып, марқұмдарға құран оқытылғанын айтты.

- Қазірге дейін адамдар қолдан келгенше көмек беріп жатыр. Олардан түскен қаржыны қаза болған бауырларымыздың отбасына бөліп береміз, - деді Шабдол Өткелов.

2011 жылы Жаңаөзен қаласында мұнайшылардың наразылық шеруін күшпен тарату кезінде полиция қолданған қару оғынан кемінде 16 адам қаза тауып, жүзден астам адам жараланған. Халықаралық демократиялық қауымдастық Қазақстан үкіметінің іс-әрекетін айыптап, қантөгістің мән-жайын анықтау үшін толық және әділетті тергеу жүргізуге шақырған.

Жаңаөзен құрбандарын еске алу шарасынан фоторепортаж:

  • 16x9 Image

    Сәния ТОЙКЕН

    Сәния Тойкен Азаттық радиосында 2007 жылдан бері жұмыс істейді. ҚазҰУ-дің журналистика факультетін бітірген. Республикалық  "Қазақстан пионері", "Жас Алаш" газеттерінде тілші болған. Қазақстан Республикасы Жекешелендіру жөніндегі комитетінің баспасөз хатшысы қызметін атқарған. Атырау облыстық "Ақ Жайық" газетінде  тілші, қазақ редакциясының редакторы, Маңғыстау облысында шығатын "Не хабар?!" апталығының редакторы болып жұмыс істеген. 

    Сәния Тойкен 2017 жылы журналист әйелдердің халықаралық қоры (IWMF) тағайындаған "Журналистикадағы батылдығы үшін" сыйлығын иеленді. Ол - бұл беделді сыйлықты алған алғашқы қазақстандық журналист.

Пікірлерді көріңіз (3)

Бұл форум жабық. Бірақ пікірталасты Азаттықтың Facebook-парақшасында жалғастыра аласыз: https://www.facebook.com/azattyq
XS
SM
MD
LG