Қазақстан футбол федерациясына (ҚФФ) қарайтын төрешілік және инспекторлық департаментінің бас директоры болып ресейлік маман Николай Левников тағайындалды. Бұл туралы бүгін ҚФФ баспасөз қызметі хабарлады.
Левников енді Қазақстанда өтетін ресми футбол жарыстарында жұмыс істейтін төрешілердің жұмысын бақылап, осы саланы басқарады. Оның келісім-шарты екі жылға жасалған. Левников 2009-2012 жылдары Қазақстанда дәл осы қызметте жұмыс істеген. Бірақ кейін Ресейге қайта оралған. Ол 2012-2016 жылдары Ресей футбол федерациясының төрелік және инспекторлық департаментінде директор болған.
"Қазақстан чемпионатында ресейлік төрешілер жұмыс істемейді. Тек қазақстандық мамандарды дайындаймыз. Төрешілердің барлығы физикалық формада болуын қатты қадағалаймыз. Артық салмағы бар төрешілер тесттен өтпейді" деді Левников бүгін Астанада өткен баспасөз мәслихатында.
Бұған дейін ҚФФ төрешілік және инспекторлық департаментінің бас директоры болған Юрий Ярышев 2016 жылы отставкаға кеткен. Оның қызметінен кету себебі айтылмады.
