Румыния үкіметі елдегі адамға толы түрмелерден кей санаттағы тұтқындарды босату мақсатында заңдағы кейбір коорупциялық қылмыс түрлері үшін белгіленген жазалау шараларын өзгертуді ұсынды. Шенеуніктердің коррупциялық іс-әрекеті 44 мың еуродан аспайтын сомаға зиян келтірген болса, оларды қылмыстық жауапкершіліктен босату туралы үкіметтің бастамасы тұрғындардың жаппай наразылығына кезікті. Коррупцияға қарсылықтарын білдірген жаппай шерулерге ондаған мың адам шығып, бейбіт жиындар кей сәттері қақтығысқа ұласты, ондаған адамды полиция ұстады. Жұрт наразылығы премьерді үкімет қаулысының жобасын кері қайтарып алуға мәжбүр етті.