Accessibility links

Мамайға "СИЗО-да қысым жасалғаны" хабарланды


Жанболат Мамай Медеу аудандық сотында жауап беріп тұр. Алматы, 11 ақпан 2017 жыл

Алматы шетіндегі ЛА155/18 тергеу изоляторында (СИЗО) отырған журналист Жанболат Мамайға камераластары тарапынан қысым жасалған деп хабарлады оның адвокаты Жанар Балғабаева.

"Бүгін таңертең Жанболатпен кездестім. Оның айтуынша, өткен жұма
күні Жанболатты басқа камераға ауыстырған. Сол жерде камераластарынан соққы жеген және моральдық қысым көрген. Денесінде көгерген жер байқамадым, бірақ Жанболат қатты мазасыз күйде болды" деді адвокат.

Оның сөзінше, Жанболат Мамай бүгін тергеу изоляторы басшылығына өзін қауіпсіз жерге, тым болмаса жалғыз адамдық камераға көшіру туралы арыз жазған. Адвокат ертеңге дейін арызға қатысты тиісті шара қолданылмаса, прокуратураға шағымданатынын айтты.

Азаттық тілшісі бұл хабардың анығын білмекке ЛА155/18 мекемесіне телефон соққан еді. Мекеме басшысы Бақытжан Баймағамбетов "Мамайға айтарлықтай қысым болмағанын" айтты. Журналистің арызданғанын растаған ЛА155/18 мекемесі басшысы "шара қолданатындарын, Жанболат Мамайды басқа камераға ауыстыру жайын қарап жатқандарын" хабарлады.

28 жастағы журналист Жанболат Мамайды ақпанның 10-ы күні сыбайлас
жемқорлыққа қарсы іс-қимыл ұлттық бюросы қызметкерлері ұстап, сот оны екі айға қамауға санкция берген. Мамайды "БТА банктен" Мұхтар
Әблязовтың кезінде ұрланған ақшаның бір бөлігінің ізін "Трибуна. Саяси
қалам" газеті арқылы қаржылық операциялар жасап жасырған" деген
күдікпен тергеп жатыр.

Жанболат Мамай өзіне тағылған айыпты жоққа шығарып, бұл істі өзінің
журналистік қызметі мен "Трибуна. Саяси қалам" газетін жабуға
бағытталған саяси астары бар әрекет деп санайтынын мәлімдеген.

Қазір шетелде жүрген опозициялық саясаткер, "БТА банк" директорлар кеңесінің бұрынғы төрағасы Мұхтар Әблязов та Мамаймен ешқашан кездеспегенін айтып, оған таққан айыпты "абсурд" деп атаған.

  • 16x9 Image

    Мәншүк АСАУТАЙ

    1980 жылы туған. Е.Бөкетов атындағы Қарағанды мемлекеттік университетін бітірген.

    Қарағанды қаласындағы жергілікті телеарнада қызмет еткен. 2004 жылдан бері Азаттықтың тілшісі. 

    Автормен оның Facebook парақшасында да пікірлесуге болады.

Пікіріңіз

Оқырман пікірлері

XS
SM
MD
LG