Accessibility links

Сот ОСС кәсіподағы белсенділерінің арызын қанағаттандырмады


Ақтау қаласының №2 сотының судьясы Мұхит Мұқашев.

Ақтау қаласының №2 соты Oil Construction Company (ОСС) мұнайшыларының қамаудағы кәсіподақ төрағасы Әмин Елеусіновтың орнына учаске бастығы Берік Бекбаевты сайлау туралы «конференция шешімін» бұзуды сұраған талап арызын қанағаттандырмады деп хабарлайды Азаттық тілшісі. Судья Мұхит Мұқашев ОСС кәсіподағы қоғамдық бірлестігі мүшелерінің арызын қанағаттандырудан бас тарту туралы қарарын 18 сәуір күні кешке жақын шығарды. Судья мұнайшылар белсендісі Құспан Қосшағұловты ОСС кәсіподақ ұйымы қоғамдық бірлестігінің төрағасы міндетін атқарушы етіп сайлаған кәсіподақтың басқарма мүшелерінің 1 наурыздағы отырысы хаттамасының заңсыз деп танылғанын мәлімдеді.

Сот отырысына куә ретінде шақырылған ОСС компаниясының жұмысшылары Сағыныш Нұрғалиев пен Руслан Әбуов "ешқандай конференцияның болмағанын", өздеріне "кәсіподақтың жаңа төрағасын сайлау туралы әлдебір қағазға мәжбүрлеп қол қойдыртқанын" айтты.

ОСС мұнайшылары кәсіподағының төрағасы міндетін атқарушы Берік Бекбаевтың тарапынан куәлік етуге келген Нұрбек Есенбаев «конференцияда» хатшы ретінде тек қол қойғанын, бірақ оған қанша адам қатысқанын білмейтінін айтты. Ал жүргізуші Ақылбек Әкімиязов "ешқандай жиналысты да, хатшыны да көрмегенін", бірақ қол қойғанын айтты.

Оларға сот отырысы үстінде компания заңгері Нұржан Оразовтың дауыстап, қалай жауап беруді үйреткені мұнайшылардың наразылығын тудырғанымен, сот естімеген сыңай танытты.

- Мұның бәрі Әминді қамауға алған соң қарапайым жұмысшының құқығын қорғап келген кәсіподақтың көзін жоюдың амалы. Жұмысшылар наразылығына қарамай Қаламқас кен орыны құрылыс құрастыру қызметінің бастығы Берік Бекбаевты кәсіподақ төрағасы міндетін атқарушы деп өтпеген конференциямен сайлаған соң, ал сотқа жұмыс беруші заңгерінің кәсіподақ адвокаты ретінде қатысқан соң басқа не күтуге болады, - дейді жұмыстан босатылған белсенділердің бірі Құспан Қосшағұлов.

Мұнайшылар кәсіподақты қорғап қалу үшін ары қарай арызданатындарын айтты.

ОСС жұмысшыларының кәсіподағы басшысы Әмин Елеусінов Ақтауда биыл қаңтардың 5-інен 21-іне дейін кәсіподақ кеңсесінде өткен мұнайшылардың жаппай аштық акциясы кезінде ұсталып, Астанаға жеткізілген соң екі айға қамауға алынған. Оған "қылмыстық сеніп тапсырылған бөтен мүлікті иемденді, талан-таражға салды", "билік өкілдеріне бағынбады, оларды ғайбаттады, кедергі келтірді" деген айыптар тағылған. Онымен бірге қамауға алынған ОСС кәсіподағының еңбек инспекторы Нұрбек Құшақбаев "заңсыз ереуілге қатысуды жалғастыруға арандатты" деп айыпталып, 2 жыл 6 ай мерзімге бас бостандығынан айырылды. Сот одан Techno Trading компаниясы талап еткен 25 миллион 200 мың теңгеге жуық "материалдық шығынды" өндіріп беруге үкім кесті.

Аштық акциясына қатысқан 63 мұнайшы азаматтық және әкімшілік соттарда жауапқа тартылды. Оларға 20-дан 50-ге дейінгі айлық есептік көрсеткішке тең айыппұл салынып, жалпы сомасы 3 854 870 теңге шығынды өтеу міндеттелді. 8 адам жұмыстан шығарылды.

AzattyqTV

AzatNews 16.11.2018
please wait
Embed

No media source currently available

0:00 0:14:38 0:00

Фотогалерея

XS
SM
MD
LG