Германия канцлері Ангела Меркельдің "Христиан демократиялық одағы" (ХДО) жексенбі күні Шлезвиг-Гольштейн аймағында өткен сайлауда жеңді.
ХДО Шлезвиг-Гольштейнде бұған дейінгі сайлауға қарағанда 2 пайыз дауыс артық алып, 32,5 пайыз жинаған. Бұл партияның басты қарсыласы - социал-демократтар партиясы бұрынғыдан 4 пайыз кем дауыс алып, 27 пайыз жинаған. Әсіреоңшыл "Германияға балама" партиясы 6 пайыз ғана - "Жасылдар" мен "Еркін демократтардан" екі есе аз - дауыс алған.
Шлезвиг-Гольштейндегі сайлау Германияда қыркүйекте өтетін бундестаг сайлауы қарсаңында сайлаушылардың көңіл ауанын бақылайтын маңызды сәт болған.
Ангела Меркельдің пікірлесі Эммануэль Макронның Франция президенті болып сайлануы ХДО-ның рейтингін біраз арттырған.
Алдағы жексенбі күні Германияның ең маңызды электоралдық аймағы Солтүстік Рейн-Вестфалияда сайлау өтеді.
