Accessibility links

"ҚазАвтоЖол": "Алтын орда" кептелісін тарқататын жол салу кешігіп басталады


Алматыдағы "Алтын орда" базары маңына салынатын жолдың картасы. 14 маусым 2017 жыл.

Алматының "Қалқаман" ықшам ауданынан әрі оңтүстік-батысқа қарай, "Алтын орда" базары алдына салынатын он жолақты жол жұмысы жоспарланған уақыттан аздап кешігіп басталады. Бұл жөнінде Азаттыққа "ҚазАвтоЖол" компаниясының қызметкері Нұрхат Ақылтаев айтты.

Оның айтуынша, жүргізушілер арасында "Алтын орда кептелісі" атанған көлік кептелісін тарқатуға септігін тигізетін он жолақты, бірнеше көпірлі жолдың жобалық-сметалық жұмыстары аяқталып, биыл маусымның 12-сінде мемлекеттік сараптамаға тапсырылған. Сараптамадан келген соң тендер өткізіліп, мердігер компания анықталады.

- Мердігер анықталысымен 3,8 шақырым жол мен ондағы жолайрықтарды салуға кіріседі. Биыл құрылысқа 2 миллиардтан астам теңге бөлініп тұр, - дейді ол.

Нұрхат Ақылтаевтың сөзінше, жұмыстың бірер айға кешігуіне "жол бойына салынады" деп жоспарланған екі гипермаркет иелерінің келіспеушілігі себеп болған. Олар инвестиция және даму министрінің орынбасары Роман Скляр және Алматы облысының әкімі Амандық Баталовтың араласуымен келісімге келген. Жол келешек гипермаркеттерге де ыңғайлы болуы үшін жоба бірнеше рет өзгертілген.

- Соңғы нұсқа бекітілді. Биыл күзде басталса, келер жылдың соңында аяқталады. "Алтын Ордадан" кейінгі "Асыл арман" ықшам ауданынан шыққан көліктер кедергісіз Райымбек даңғылына шығады. Іргелі, Абай ауылдары тұсынан айналма жол түседі, - деген ол Азаттыққа жаңа жолдың жобасын көрсетті.

Алматы облысына қарасты республикалық маңыздағы жолдарды жоспарлайтын "ҚазАвтоЖол" компаниясы былтыр қыркүйек айында "Алтын Орда кептілісін" тарқататын он жолақты жол 2017 жылы мамыр, маусым айларында басталатынын мәлімдеген. Сол кезде Азаттыққа сұқбат берген Нұрхат Ақылтаев жол салуға 10 миллиард теңге қажет екенін айтқан.

"ҚазАвтоЖол" компаниясының мәлімдемесінен кейін Алматы қаласы жолаушылар көлігі және автомобиль жолдары басқармасы да осыған ұқсас ақпарат таратып, "Алтын орда", "Барлық" базарының жол бойындағы сауда нүктелері 2017 жылдың сәуір айына дейін сүрілетінін хабарлаған.

"Алтын орда кептелісі" бірнеше жылдан бері Алматы қаласынан кіріп, шығатын көлік қозғалысын қиындатқан.

Азаттықтың "Алтын орда" базары маңындағы көлік кептелісі жайлы видеосы (22.09.2016)

  • 16x9 Image

    Асылхан МАМАШҰЛЫ

    1973 жылы 22 сәуірде дүниеге келген. 1994 жылы Қорқыт ата атындағы Қызылорда пединститутын бітірген. 1997-2000 жылдары әл-Фараби атындағы Қазақ ұлттық университетінің аспирантурасында оқыған. "Қазақ энциклопедиясы" баспасында (2001-2007), республикалық "Ана тілі" газетінде (2007-2009) , "ABDI-press" орталығында (2009-2010) жұмыс істеген. 2011 жылдан Азаттық радиосының тілшісі.

    Тарихи, саяси мәселелер тақырыбында жазады, белгілі тұлғалардың саяси портреттерін жасайды. Автормен оның Facebook парақшасында да пікірлесуіңізге болады.

Пікіріңіз

Оқырман пікірлері

AzattyqTV

XS
SM
MD
LG