Accessibility links

АҚШ вице-президенті Эстония, Грузия және Черногорияға барады


АҚШ вице-президенті Майк Пенс.

АҚШ вице-президенті Майк Пенс Ресейдің саясатына байланысты алаңдаушылық танытып отырған үш елге сапарын жексенбі күні Эстониядан бастамақшы. Ақ үйдің хабарлауынша, Пенс Таллинге шілденің 30-ында келеді, одан соң Грузия мен Черногорияға барады.

АҚШ әкімшілігінің лауазымды тұлғаларының айтуынша, Пенстің сапары президент Дональд Трамптың шілденің басында Еуропаға сапарының жалғасы ретінде болмақ. Бұған дейін Трамп НАТО-ға қолдау білдіру үшін Польша мен Германияға барған, сонымен бірге ол Мәскеумен қарым-қатынасты жақсарту мақсатында Ресей президенті Владимир Путинмен кездескен.

Трамп шілденің 6-сы күні Варшавада сөйлеген сөзінде АҚШ НАТО ұйымы бойынша одақтастары алдындағы міндетіне адалдығынан айнымайтыны туралы мәлімдеп, Ресейдің көршілеріне қатысты іс-әрекетін сынаған.

Эстония мен Черногория НАТО-ға мүше, ал Грузия Солтүстікатлантикалық альянсқа қосылуға үмітті. Пенс сондай-ақ осы елдердегі АҚШ инвестициясы мен саудасына қолдау білдіріп, құқықтық мемлекет, сөз бостандығы, діни төзімділіктің маңызын атап өтпек. Эстонияда Пенс премьер-министр Юрий Ратаспен, сонымен қатар Латвия және Литва жетекшілерімен кездеседі.

Тбилисиге шілденің 31-і күні баратын Пенс Кавказ елдерінің егемендігі мен территориялық тұтастығына АҚШ-тың қолдауын білдіреді. 2008 жылы Ресей армиясы Грузияға басып кіріп, осы елдің сепаратистік екі аймағы - Оңтүстік Осетия мен Абхазияға бақылау орнатқаны мәлім.

Шілденің 27-і күні Грузия президенті Георгий Маргелашвили Пенстің сапары АҚШ-тың Грузияға қолдауын көрсетеді деп мәлімдеген. Маргелашвили грузин армиясы шілденің 30-ында АҚШ және өзге де серіктес елдермен бірлескен әскери жаттығулар бастайтыны туралы хабарлаған. Пенс Грузиядағы АҚШ әскерилерімен кездеседі деп жоспарланған.

"Вице-президенттің қатысуы әңгіме әскери жаттығулар туралы ғана емес, сонымен бірге біздің құндылықтарымызды, сыртқы саясаттағы мақсаттарымызды біріктіретінімізді және бірге екенімізді паш етеді", - деген Маргелашвили.

Сапарының соңында АҚШ вице-президенті НАТО құрамына биылғы маусымда жаңадан қабылданған Черногорияға барады. Ол тамыздың 2-і күні Подгорицада Адриатикалық хартия саммитіне қатысады. Пенс АҚШ-тың Батыс Балкан елдеріне қолдауын білдіріп, аймақта саяси реформалар мен заң үстемдігі қажеттігін атап өтпек. Саммитке Албания, Босния мен Герцеговина, Хорватия, Косово, Македония, Сербия мен Словения жетекшілері де қатыспақшы.

AzattyqTV

XS
SM
MD
LG