Accessibility links

"Қазсушар": Киров су қоймасынан су аздан жіберіле бастады


Қырғызстанның Талас облысындағы Киров су қоймасы.

"Қырғызстанның Талас облысындағы Киров су қоймасынан Жамбыл облысына су жіберіле бастады деп хабарлады Азаттыққа "Қазсушар" республикалық мемлекеттік кәсіпорынның Жамбыл облысындағы филиалы басшысының орынбасары Ғалия Зәрубаева.

Ғалия Зәрубаеваның айтуынша, Киров су қоймасынан Қазақстанның Талас су торабына су аз көлемде кеше жіберіле бастаған.

- Киров су қоймасынан Талас су торабы сағатына 264 текше метр суды қабылдап алуға қауқарлы. Қырғыз жағы ары кетсе сағатына 100 текше метр су жібереміз деп отыр. Кеше сағатына 50 текше метр су жіберген, бүгін 60 текше метрге көбейтті. Егер олар сағатына 100 текше метр су жіберетін болса су қоймасындағы суды бір тәулікте жіберіп бітеді, - дейді Ғалия Зәрубекова.

Оның сөзінше, Жамбыл облысы егістік алқаптарына суды негізінен Қырғызстаннан алады. Жыл сайын Қырғызстанмен келісім арқылы кесте жасалынады.

- Қазақстан жылына Киров қоймасынан жалпы 808 миллион текше метр су алады. Биыл 660 миллион текше метр су алу келісілген. Су қоймасынан бірінші болып Жамбыл, Байзақ, Талас, Сарысу ауданы мен Тараз қаласына су келеді, - дейді Ғалия Зәрубаева.

Оның айтуынша, Киров су қоймасын жөндеу үшін Қазақстан жағынан ақша бөлінеді. Қазіргі кезде су қоймасының конус жапқышын жөндеу қажет болып тұр.

Ғалия Зәрубаева Қырғызстандағы Киров су қоймасынан еш қауіп жоқ екенін айтады. "Біз келетін суды қабылдап алуға дайынбыз. Жамбыл облысына келетін еш қауіп жоқ" деді ол.

Су қоймасының жөндеу жұмыстары Қазақстан мен Қырғызстан шекарасында туындаған мәселемен тұспа-тұс келуі ақпарат құралдары мен әлеуметтік желілерде түрлі болжамдар тууына негіз болған.

Мұндай болжамдарда Киров су қоймасынан судың жіберілуі Қазақстанның шекарадағы бақылау-тексеруді күшейткені, Қырғызстанның кейбір компанияларының Қазақстанға әкелетін сүт өнімдеріне тыйым салуы, Қазақстандағы қырғыз еңбек мигранттарын тексеруді күшейтуіне жауап шара болуы мүмкін делінген.

Киров су қоймасындағы судың 12 пайызын Қырғызстан, ал қалғанын Қазақстан пайдаланып келген. Қырғызстандағы бұл қойма 1975 жылы салынған.

Қырғызстан ресми билігінің Азаттыққа бұрын берген мәліметтерінде Киров су қоймасы 550 миллион текше метр суға арналғаны айтылған.

  • 16x9 Image

    Дилара ИСА

    Дилара - Азаттықтың Шымкенттегі тілшісі. 1986 жылы туған. Солтүстік Қазақстан мемлекеттік университеті мен Абай атындағы ҚазҰПУ-ді бітірген.

    "Жас Алаш" газетінде жұмыс істеген.

    Азаттықпен 2012 жылдан бері әріптес.

XS
SM
MD
LG