Оңтүстік Қазақстан облыс Жетісай қаласының экс-әкімі, "200 мың теңге пара алды" деген күдікке ілінген Байдуалы Базарбаевқа Мақтарал аудандық соты үкім шығарды.
Аудандық сот судьясы Сейілхан Мұсабековтің Азаттыққа хабарлауынша, экс-әкім Қылмыстық кодекстің 366-бабы 2-бөлігімен ("Пара алу") айыпты деп танылған. "Байдуалы Базарбаев тағылған айыпты толық мойындады. Сот оған 12 миллион айыппұл салды және оны 15 сәуірге дейін өтеуді тапсырды" дейді судья.
Экс-әкім "жұмыс кабинетінде пара алып жатқан жерінде" ұсталған. Үйін кепілге қойып қамаудан босатылған оны жемқорлыққа қарсы іс-қимыл ұлттық бюросының Мақтарал аудандық басқармасы қызметінен шеттету туралы ұсыныс тастаған. Сот бұл ұсынысты қанағаттандырған болатын.
