Ресей аннексиялап алған Қырым түбегінде электр пойызы жолаушысы бар шағын автобусты соғып, салдарынан бес адам мерт болған. Бұл туралы апат орнындағы жедел штабтағы дереккөзіне сілтеме жасап "Интерфакс" хабарлады.
Сәуірдің 8-і күні жергілікті уақытпен сағат 12-ге қарай Красноперекопск ауданындағы теміржол арқылы өтетін көлік өткеліне шығып кеткен Mercedes маркалы шағын автобусты жылдамдықпен келген Керчь - Армянск бағытындағы электр пойызы соққан. Алдын ала болжам бойынша, оқиға автобус жүргізушісінің кінәсінен болған.
Севастопольден Армянск қаласына бара жатқан шағын автобустағы бес адам қазаға ұшырап, төрт адам жарақат алған деп хабарлады Ішкі істер министрлігінің аймақтық басқармасы. Пойыздағы адамдардың ешқайсысы зардап шекпеген.
Теміржолдағы апаттың мән-жайы анықталып жатыр.
