Қазақстан ішкі істер министрі Қалмұханбет Қасымов 10 мамырда Астана, Алматы және бірнеше қалада болған наразылық шарасындағы полицияның әрекетіне қатысты пікірін айтты.
"Олар [полиция] Бас прокуратураның нұсқаулығына сай әрекет етті. [Наразылыққа шыққандарға] тәртіп бұзушылық туралы ескерткен. Бағынбағандарға әкімшілік жаза қолданды. Материалдарды сотқа жіберді. Сот шешім шығарды" деді министр үкімет отырысынан кейін Азаттық тілшісіне.
Оқи отырыңыз: Наразылық шарасынан кейін қанша адам жазаланды?
Мамырдың 10-ы күні Астана, Алматы және бірнеше облыс орталығында "саяси тұтқындарды босату" және "түрмедегі азаптауларды тоқтатуды" талап еткен наразылық шарасы өткен. Наразылық шарасына келген ондаған адамды полиция ұстаған. Қуғындағы банкир Мұхтар Әблязов Қазақстанда болған митингілерді "мен ұйымдастырдым" деген.
