Қазақстан президенті Нұрсұлтан Назарбаев Астанада жаңадан салынған "Бейбітшілік қабырғасы" монументін ашты. Кешенді Ақтөбе облысы Астананың 20 жылдығына сый ретінде салған.
Тәуелсіздік алаңында "Қазақ елі" монументіне жақын салынған кешен 29 тамыз - Семей полигоны жабылған күні әрі Халықаралық ядролық сынақтарға қарсы іс-қимыл күнінде ашылып отыр. Кешеннің ашылу салтанатына дипломатиялық миссия өкілдері, шенеуніктер мен парламент депутаттары және Астанада өтіп жатқан Ядролық сынаққа жаппай тыйым салу жөніндегі келісім ұйымының конференциясына келген қонақтар қатысты.
Жалпы ұзындығы 111 метр, ені 18,4 метрге дейін жететін, биіктігі 17,5 метрлік мемориал үш бөліктен тұрады. Сәулетшілер кешеннің алғашқы бөлігі шашыраңқылық пен оқшаулануды, екінші бөлігі үміт пен еркіндікті, үшінші бөлігі - бейбітшілікті сақтау жолын білдіретінін айтады. Мемориалда "Бейбітшілік" сөзі 51 тілде жазылған.
1949 жылдың 29 тамызында Совет одағы ашқан Семей полигоны 1991 жылы 29 тамызда жабылды. Полигонда 40 жылға созылған сынақ барысында 400-ден астам ядролық жарылыс (олардың 116-сы жер бетінде) жасалды.
Семей полигоны жайлы фотогалерея
