Accessibility links

Министр: Фердауси мектебіндегі жайға қатысты комиссия құрамыз


Фердауси атындағы жалпы орта мектете сабақта отырған мектеп оқушылары. Түркістан облысы Мақтарал ауданы Фердауси ауылы, 14 қыркүйек 2017 жыл.

Білім және ғылым министрі Ерлан Сағадиев Түркістан облысы Мақтаарал ауданындағы Фердауси ауылында хиджаб тағып барған қыздарды мектепке кіргізбеуге қатысты түсінік берді. Азаттық тілшісінің хабарлауынша, Астанада үкімет отырысының арасында Азаттық тілшісіне осы мәселе бойынша жауап берген Сағадиев "заң бойынша оқушылар сабаққа орамалмен кіргізілмейтінін" айтты. Оның сөзінше, министрлік бұл мәселеге қатысты аймаққа арнайы комиссия жіберіп, жағдайды реттемек.

Бұған дейін, 3 қыркүйекте Фердауси атындағы жалпы орта мектепте мектеп басшылығының сабаққа орамал тағып келген оқушы қыздарды мектепке кіргізбей қойғаны хабарланған еді. Әлеуметтік желіде өзін "орамал тағатын оқушы қыздардың бірінің бауырымын" деп таныстырған қолданушы Фердауси мектебінің алдында орамал таққан ондаған оқушыны мектеп басшылығы мен полицей формасындағы адамдардың мектепке кіргізбей тұрғаны туралы видео жариялаған.

Түркістан облыстық білім басқармасының баспасөз қызметінің өкілі Азаттыққа Фердауси ауылында 1 қыркүйектен бастап орамал тағатын оқушы қыздардың сабаққа кіргізілмей жатқанын растады. Оның сөзінше, биыл жазда арнайы топ ата-аналар арасында бұл мәселеге қатысты түсіндіру жұмыстарын жүргізген. "Заң бәріне бірдей, біз зая аясында жұмыс істеп жатырмыз" деді баспасөз қызметінің өкілі.

Фердауси ауылындағы орамал дауы былтыр да болған. Бұл ауыл Шымкент қаласынан шамамен 300 километр қашықта орналасқан. Ауыл тұрғындарының барлығының дерлік ұлты – тәжік, оқу орны да тәжік мектебі. Мұнда оқушы қыздар орамалды "ұлттық дәстүрге байланысты тағады".

Қазақстанның кей аймақтарында оқушы мектепке орамал тағып келуі мен оларды мектепке кіргізбеу былтырдан бері даулы мәселеге айналған.

Даудың басы білім министрлігі 2016 жылы қаңтарда шығарған мектеп формасы ережесі туралы №26 бұйрығы болып отыр. Онда мектепте қандай да бір дінді насихаттайтын киім киюге тыйым салынған.

  • 16x9 Image

    Өркен ЖОЯМЕРГЕН

    Өркен Жоямерген 2006 жылы әл-Фараби атындағы Қазақ ұлттық университеті журналистика факультетінің бакалаврын, 2008 жылы магистратурасын тәмамдаған. Қызмет жолын "Алматы Ақшамы" газетінен бастаған. Алматы және Астана қалаларындағы бірқатар бұқаралық ақпарат құралдарында жұмыс істеген. Қазір Азаттық Радиосы Астана бюросының жетекшісі. 

    Автормен оның Facebook парақшасында да пікірлесуіңізге болады.

ПІКІРЛЕР

XS
SM
MD
LG