Accessibility links

Алматыда театрдың экс-қызметкерлері басшыдан "қысым көргенін" айтады


"Алатау" дәстүрлі өнер театрының бұрынғы қызметкерлері мен адвокаттар Жанаргүл Боқаева (сол жақ шетте) және Айман Омарова (сол жақтан үшінші) баспасөз мәслихатында отыр. Алматы, 12 қыркүйек 2018 жыл.

Алматыда "Алатау" дәстүрлі өнер театрының жұмыстан шыққан бұрынғы он шақты қызметкері Алматыда Қазақстандағы адам құқығы бюросының кеңсесінде баспасөз мәслихатын өткізді.

Театрдың бұрынғы қызметкерлері Амангелді Мамырбеков пен Ғалия Батырхан 2017 жылы Берік Жүсіпов театрға директор болып келген соң ұжым қызметкерлеріне басшылық тарапынан түрлі "қысым, қоқан-лоқы жасалғанын" айтып, жұмыстан "өз еркімен" шығуға мәжбүр болғандарын мәлімдеді. Жұмыстан шыққандар арасында шығармашылық адамдары, басқа да позицияда жұмыс істегендер бар.

Бұрынғы қызметкерлердің айтуынша, жаңа басшы келген бір жыл ішінде сексенге тарта адам жұмыстан шыққан.

Бұрынғы қызметкерлер театр басшылығының қызметіне байланысты еңбек инспекциясы, прокуратура, мәдениет басқармасы және "Нұр Отан" партиясына шағымданғанын, бірақ әзірге олар шара қолданбағанын айтады.

Жиынға қатысқан адвокаттар Айман Омарова мен Жанаргүл Боқаева театрдың бұрынғы қызметкерлері айтқан шағымдар бойынша сыбайлас жемқорлыққа қарсы іс-қимыл ұлттық бюросы мен прокуратураның тексеру жүргізуін сұрады.

Театр директоры Берік Жүсіпов Азаттық тілшісімен телефонмен сөйлескенінде өзіне қатысты мәлімдемелерге бүгін жауап бере алмайтынын айтты. Директордың шығармашылық мәселелер жөніндегі орынбасары Азамат Ақан 80-нен астам адамның жұмыстан шыққанын растады, бірақ бұрынғы қызметкерлердің " басшылық қысым жасады" дегенін терістеді. Оның сөзінше, экс-қызметкерлер "жұмыс көлемі бұрынғы басшы кезіндегімен салыстырғанда көбейгендіктен" және "жалақыны азсынып" жұмыстан шыққан.

  • 16x9 Image

    Нұргүл ТАПАЕВА

    Нұргүл Тапаева 2012 жылы Түркістандағы Қожа Ахмет Яссауи атындағы Халықаралық қазақ-түрік университетін журналистика мамандығы бойынша бітірген. 2008 жылдан бастап қалалық, облыстық, республикалық телеарналарда журналист, редактор болып жұмыс істеген. 2016 жылдан бері Азаттық радиосының тілшісі. 

    Автормен оның Facebook парақшасында да пікірлесуіңізге болады.

ПІКІРЛЕР

XS
SM
MD
LG