Accessibility links

Теңіздегі оқиға кезінде 30 адам зардап шеккен


Теңіздегі жұмысшылар наразылығы.

Атырау облысы Жылыой ауданы Теңіз жұмысшылар кентінде болған оқиға кезінде 30 адам зардап шеккен. Бұл ақпаратты Атырау облыстық әкімдігінің баспасөз қызметі таратты.

Әкімдіктің хабарлауынша, 29 маусымда түстен кейін наразылыққа шыққан жұмысшылармен Атырау облысының бірінші орынбасары Серік Шәпкенов кездескен. Кездесу кезінде "тұрмыстық жанжалды ушықтыруға болмайтыны", "кеніштегі еңбекті ұйымдастыру мәселелері" талқыланған. Оқиғаға байланысты ведомствоаралық комиссия құрылып, оған "Теңізшевройл" (ТШО) мен оған қарайтын мердігер мекеме Сonsolidated Contracting Engineering and Procurement S.A.L Offshore (CCEP) өкілдері кіретіні айтылған.

Әкімдіктің хабарлауынша, жұмысшылар тараған, жағдай тұрақтанған. Билік бұған дейін әлеуметтік желіде тараған "оқиғадан бір адам қаза тапты" деген ақпаратты жоққа шығарған.

"ТШО медициналық бөлімшесінде 30 адамға медициналық көмек берілді. Қазір олардың өміріне қауіп жоқ. Қаза тапқандар жоқ" деді әкімдік өкілдері.

Қазақстанның ішкі істер министрлігі Теңіз жұмысшылар кентіндегі оқиғаға байланысты "бұзақылық" бабы бойынша сотқа дейінгі тергеу амалдары басталғанын хабарлады.

"Қазіргі кезде жанжал жоқ. Ішкі істер министрлігі жалған ақпаратты таратпауға кеңес береді. Оқиға орнында полиция қызметкерлері қауіпсіздікті бақылап тұр. Жағдай тұрақты және ішкі істер органдарының бақылауында" делінген министрлік хабарламасында.

Бұған дейін әлеуметтік желіде "Теңіз кенішінде болған оқиға" туралы бірнеше видео тараған еді. Видеода CCEP деген жазуы бар ашық жасыл, сары түсті униформа киген жұмысшылардың бірнеше азаматты ұрып-соққаны, таяққа жығылған азаматтардың қансырағаны көрінеді. Кейін Теңізде кемінде мың адамның наразылыққа шыққаны хабарланды. Жергілікті биліктің хабарлауынша, CCEP жұмысшылары 29 маусымда таңғы сағат 11-де наразылыққа шыққан. Оған WhatsApp-та тараған сурет түрткі болған.

"[Жұмысшылар] Ливия азаматы Eli Daoud-тың WhatsApp-та жариялаған қызбен бірге түскен суретіне наразы болған" деп жазылған әкімдіктің баспасөз қызметінің хабарламасында.

Азаттық тілшісі сөйлескен аты-жөнін айтпаған жұмысшылардың бірі "жұмысшылардың көптен бері жұмыстағы [жергілікті және шетел жұмысшылары арасындағы] теңсіздікке байланысты ызаланып жүргенін", "WhatsApp-тағы суреттен кейін шыдамай наразылыққа шыққанын" айтты. Қарсылық танытқан адамдардың санына байланысты әртүрлі дерек (бір мың мен 15 мың арасында) айтылады.

Атырау облыстық полициясы жанжал себебін тексеріп жатқанын хабарлады.

Оқи отырыңыз: Теңізде не болды?
  • 16x9 Image

    Сәния ТОЙКЕН

    Сәния Тойкен Азаттық радиосында 2007 жылдан бері жұмыс істейді. ҚазҰУ-дің журналистика факультетін бітірген. Республикалық  "Қазақстан пионері", "Жас Алаш" газеттерінде тілші болған. Қазақстан Республикасы Жекешелендіру жөніндегі комитетінің баспасөз хатшысы қызметін атқарған. Атырау облыстық "Ақ Жайық" газетінде  тілші, қазақ редакциясының редакторы, Маңғыстау облысында шығатын "Не хабар?!" апталығының редакторы болып жұмыс істеген. 

    Сәния Тойкен 2017 жылы журналист әйелдердің халықаралық қоры (IWMF) тағайындаған "Журналистикадағы батылдығы үшін" сыйлығын иеленді. Ол - бұл беделді сыйлықты алған алғашқы қазақстандық журналист.

ПІКІРЛЕР

XS
SM
MD
LG