Accessibility links

Нұр-Сұлтан тұрғыны зорлық-зомбылыққа қарсы бір адамдық пикет өткізді


Шолпанай Тангирова жалғыз адамдық пикетке шыққан сәт. Нұр-Сұлтан, 7 тамыз 2019 жыл.

7 тамызда Нұр-Сұлтан тұрғыны Шолпанай Тангирова қаладағы темір жол вокзалы маңында зорлық-зомбылыққа қарсы бір адамдық пикет өткізді. Ол қолына "Зорлық – ауыр қылмыс", "Зорлық-зомбылықтың жазасын ауырлатуды талап етемін! Зорлағандарды емес, зорланғандарды қорғаңыздар! Зорлаған адам айыпты!" деген жазуы бар плакаттар ұстап шықты.

23 жастағы Шолпанай Тангирова массаж салонында жұмыс істейді. Ол 26 шілдеде Қостанай сотының "Тұлпар-Тальго" пойызында ақтөбелік әйелді зорлады деп айыпталған екі жолсерікке шығарған үкіміне наразы екенін айтты. Оның ойынша, "бұл үкім тым жұмсақ және ондай әлсіз үкім шығарған судья отставкаға кетуі тиіс".

Тангирова Қазақстан билігінен зорлық-зомбылық бабын орташа дәрежелі қылмыстан аса ауыр қылмысқа ауыстыруды да талап етті. Оның сөзінше, "билік заңдар қатайтылды дегенімен зорлыққа ұшыраған балалар да көп".

Былтыр қыркүйекте Нұр-Сұлтаннан Ақтөбеге бару үшін "Тұлпар-Тальго" пойызына мінген жолаушыны түнде купеге өз кілттерімен кірген екі жолсерік зорлаған. Кейін жәбірленуші "НеМолчиKZ" қоғамдық қорынан көмек сұраған. Ал қор жетекшісі Дина Смаилова бұл оқиға жайлы өзінің Facebook парақшасына жариялағаннан кейін көпшілік назар аударды.

26 шілдеде Қостанай соты "Тұлпар-Тальго" пойызында ақтөбелік әйелді зорлады деп айыпталған екі жолсерікке үкім шығарды. Судья Оразбай Сатыбалды айыпталушылар Жетес Үмбеталиев пен Қолғанат Құрманиязовты Қылмыстық кодекстің "Зорлық" бабы бойынша кінәлі деп танып, 2,5 және 2 жыл үш айға соттады. Мұның алдында прокурор оларды алты жылға соттауды сұраған еді. Кейін қоғамда сот шешіміне наразылық күшейіп, елдің көлік прокуратурасы сот үкіміне апелляциялық шағым түсірген.

  • 16x9 Image

    Сәния ТОЙКЕН

    Сәния Тойкен Азаттық радиосында 2007 жылдан бері жұмыс істейді. ҚазҰУ-дің журналистика факультетін бітірген. Республикалық  "Қазақстан пионері", "Жас Алаш" газеттерінде тілші болған. Қазақстан Республикасы Жекешелендіру жөніндегі комитетінің баспасөз хатшысы қызметін атқарған. Атырау облыстық "Ақ Жайық" газетінде  тілші, қазақ редакциясының редакторы, Маңғыстау облысында шығатын "Не хабар?!" апталығының редакторы болып жұмыс істеген. 

    Сәния Тойкен 2017 жылы журналист әйелдердің халықаралық қоры (IWMF) тағайындаған "Журналистикадағы батылдығы үшін" сыйлығын иеленді. Ол - бұл беделді сыйлықты алған алғашқы қазақстандық журналист.

ПІКІРЛЕР

XS
SM
MD
LG