Accessibility links

"Қытай жобаларына" қарсы шыққан ақтөбеліктер Тоқаевқа петиция жазды


Ақтөбедегі наразылық. 5 қыркүйек 2019 жыл.

5 қыркүйек күні кешке Ақтөбеде ондаған адам облыс әкімдігі алдындағы алаңға барып, "Қытай жобаларына" қарсылық білдірді. Қазақстан президенті Қасым-Жомарт Тоқаевтың атына жазылған петицияға қол қойып, президенттің Қытай сапарынан бас тартуын талап етті.

150 адам қол қойған петицияда тұрғындар елдегі "Қытай жобаларын" жабуды талап еткен. Акцияға келгендердің бірі Нығметбай Ермахановтың айтуынша, тұрғындар президентке хатты 6 қыркүйекте egov арқылы жібермек.

- Біз Жаңаөзенді қолдаймыз! "Қытайдың 55 зауыты" - Қазақстанның болашағына төніп тұрған үлкен қауіп. Билік Қытай жобаларынан бас тартуы керек, - деді қала тұрғыны Түгелжан Оразғалиев.

Ақтөбедегі наразылық. 5 қыркүйек 2019 жыл.
Ақтөбедегі наразылық. 5 қыркүйек 2019 жыл.

Өзін "Ақтамақпын" деп таныстырған әйел облыс әкімдігі жанындағы наразылық акциясына осымен үшінші күн қатарынан шығып тұр. Оның пікірінше, наразылық танытушылар Қытай халқына қарсы емес - Қазақстанның қазба байлықтарын талан-таражға салған ел билігіне қарсы.

Жергілікті билік пен күштік құрылым өкілдері 5 қыркүйек күнгі акцияны сырттай бақылап қана тұрды. Наразы топ екі сағаттан астам "Қытай экспанциясына жол жоқ!" , "Жаңаөзенді қолдаймыз!", "Оян, қазақ!" деп ұрандатты. Соңында патриоттық әндер айтып, 6 қыркүйек күні тағы да жиналмақ болып келісіп, тарасты.

3 қыркүйектен бері елдің түкпір-түкпірінде жаңаөзендіктерді қолдау акциясы өтіп келеді. 2 қыркүйекте екі жүз шақты Жаңаөзен тұрғыны Қазақстанда Қытай ықпалының күшейгенін айтып, наразылық білдірген.

5 қыркүйекте Нұр-Сұлтанда өткен брифингте премьер-министрдің орынбасары Жеңіс Қасымбек Қазақстан мен Қытайдың бірлесіп жүзеге асырып жатқан жобалары жайлы ақпарат халыққа дұрыс жетпей жатқанын айтып, сыртқы істер министрлігіне қарасты инвестиция жөніндегі комитет толық ақпарат беруі тиіс деген.

Оқи отырыңыз: Вице-премьер Қытаймен бірлескен 55 жобаға байланысты түсініктеме берді

  • 16x9 Image

    Жаңагүл ЖҮРСІН

    Жаңагүл Жүрсін - Азаттықтың Ақтөбе облысындағы тілшісі. 1975 жылы 16 желтоқсанда дүниеге келген. 1996 жылы Қ.Жұбанов атындағы Ақтөбе университетін бітірген. Еңбек жолын Ақтөбе облыстық телевидениесінен бастап, әр жылдары осы өңірдегі түрлі БАҚ-та тілші, редактор, бас редактор қызметін атқарған. Азаттықпен 2011 жылдан бері әріптес.

ПІКІРЛЕР

XS
SM
MD
LG