Accessibility links

Пойыз бен автобус соқтығысқан Шамалғанда адамдар көпір салуды талап етіп жолды жапты


Қарасай ауданының әкіміне талаптарын айтып тұрған тұрғындар. Алматы облысы, Шамалған станциясы, 15 қыркүйек 2019 жыл.

15 қыркүйекте сағат 22.30 шамасында Алматы облысы Қарасай ауданы аумағындағы Шамалған станциясында ондаған азамат пойыз жолын жауып, биліктен көпір салуды талап етті. Мұнда үш сағат бұрын теміржол өткелінде пойыз бен автобус соқтығысып, бір адам қаза тапқан.

Оқиға орнынан Азаттық тілшісінің хабарлауынша, тұрғындар теміржол өткелінде үнемі кептеліс болатынын және апаттың жиілегенін айтып шағынған. Жиналған адамдар көпір салуды талап етіп "Көпір! Көпір!" деп ұрандады.

- 11 жылдан бері таң мен кеште, жұмысқа барарда және қайтарда ылғи осындай кептелісте сағаттап тұрамыз. Басшылар "көпір картада бер" деп айтады. Ұзақ жолға жүретін жүргізушілер картадан көреді де осында келеді, бірақ көпір жоқ. Егер келіспесе, күн сайын кешкі 17.00 мен 21.00 арасында пойызды тоқтатсын. Біз үйлерімізге өтіп алайық. Одан кейін жүргізе берсін. Егер бүгін демалыс болмай, сабақ болғанда не болар еді? Саяжайдан автобус-автобус оқушы келеді, - дейді өзін Болат Бөкебаев деп таныстырған Шамалған тұрғыны.

- Әдетте осындай оқиғаларда жүргізушіні кінәлап жатады. Ол қайдан кінәлі болсын? Артында да, алдында да көлік болды. Бүгінгі оқиғаның қалай болғанын өздеріңіз де көрдіңіздер. Көпір салып берсін! - дейді ол.

Темір жолды жапқан тұрғындар. Алматы облысы, Шамалған станциясы 15 қыркүйек 2019 жыл.
Темір жолды жапқан тұрғындар. Алматы облысы, Шамалған станциясы 15 қыркүйек 2019 жыл.

Жанындағы тұрғындар да Болаттың сөзін қостады. "Көпір мәселесін айтқанымызға қанша жыл болды. Балаларды да басып кетіп жатыр" деді тұрғындардың бірі.

Ал Қарасай ауданының әкімі Жандарбек Далабаев "көпірдің схемасы жасалғанын" айтып, тұрғындарды сабырға шақырған. "Сейсенбі күні келіңіздер, мәселені талқылайық" деді ол наразы жұртқа.

Ресми мәліметке қарағанда, 15 қыркүйекте кешкі сағат 19.00 шамасында Алматы облысы Шамалған станциясында пойыз бен автобус соқтығысып, автобус жүргізушісі қаза тапқан, үш адам Қаскелең ауруханасына жеткізілген. "Олардың жағдайы ауыр" дейді ресми орындар.

Бұл оқиғаға байланысты қылмыстық іс ашылған.

"Темiржол, әуе, теңіз немесе өзен көлiгi жүрісі немесе оларды пайдалану қауiпсiздiгi қағидаларын бұзу" туралы 344 баптың және "көлiк құралдарын басқаратын адамдардың жол жүрісі немесе көлiк құралдарын пайдалану қағидаларын бұзу" туралы 345 баптың "абайсызда адам өліміне әкеп соққан" тармақтары бойынша қылмыстық іс қозғалған. Полиция жол апатының себептерін тексеріп жатқанын хабарлады.

Шамалғандағы жол апаты. Әлеуметтік желіде тараған видео. (15.09.2019)

  • 16x9 Image

    Нұртай ЛАХАНҰЛЫ

    Нұртай Лаханұлы. 1973 жылы дүниеге келген. 1998 жылы әл-Фараби атындағы қазақ ұлттық университетінің филология факультеті бойынша тәмамдаған.  «Қазақстан-Заман» газеті мен «Қазақ радиосында» қызмет еткен. 2010 жылдан бері Азаттық радиосында  жұмыс істейді.

ПІКІРЛЕР

XS
SM
MD
LG