Accessibility links

"Митингі" алдында қауіпсіздік шаралары күшейтілді


"Астана" алаңында тұрған полиция газельдері. Алматы, 26 қазан 2019 жыл.

Елде тыйым салынған оппозициялық қозғалыстың митингісі болады деген күні Алматыда күштік құрылымдар "Астана" алаңын қоршап, Қазақ-Британ техникалық университетінің маңында автозактар мен автобустар тізіліп тұрды. Бірнеше жедел жәрдем көлігі де байқалды. Оқиға орнында жүрген Азаттық тілшісінің хабарлауынша, алаңда ондаған полиция қызметкері жүр. Алаң маңындағы саябақ та күзетке алынған.

"Астана" алаңы маңындағы саябақ. Алматы, 26 қазан 2019 жыл.
"Астана" алаңы маңындағы саябақ. Алматы, 26 қазан 2019 жыл.

Шымкентте де полиция орталықтан тысқары орналасқан "Наурыз" алаңын бақылауға алған. Оқиға орнында жеті-сегіз полиция көлігі, 20 шақты қызметкер тұр. Нұр-Сұлтан мен Ақтөбеде де қауіпсіздік шарасы күшейтілді. Нұр-Сұлтанда 26 қазанда Бейбітшілік көшесі бойындағы "Астана" концерт залы алдындағы аумақ жан-жақтан қоршалып, жерасты жолы жабылды. Мұнда полицейлер жүр, бірнеше автобус тұр. Ақтөбеде күштік құрылымдар Әбілқайыр хан мен Абай даңғылының қиылысында жұрт жиналатын аллеяны қоршап тастады.

26 қазанда Алматыда бірнеше белсенді үйлерін полиция күзетіп тұрғандықтан сыртқа шыға алмай қалғанын хабарлады. Белсенділер Сүйіндік Алдабергенов пен Ермек Қазиевті полиция үйлерінен алып кеткен. Адвокат Салауат Сәскебаевтың Азаттыққа айтуынша, Ермек Қазиевтің ұсталуына байланысты түс кезінде Бостандық аудандық ішкі істер басқармасына барған кезде адвокатты ол жаққа кіргізбей, ақпарат бермей қайтарған.

Осыған ұқсас ақпарат Қазақстанның басқа аймақтарында да тарап жатыр. 26 қазанға қараған түні Алматыда бірнеше белсендінің ұсталғаны хабарланды. Олардың телефондары өшіп тұр. Полиция жауап бермеді.

Оқи отырыңыз: Алматыда бірнеше белсендінің ұсталғаны хабарланды

Бұған дейін өзін билік оппоненті ретінде атайтын, шетелде жүрген қуғындағы бұрынғы банкир Мұхтар Әблязов 26 қазанда жақтастарын көшеге шығуға шақырған. Қазақстанның бас прокуратурасы "рұқсат етілмеген митингіге қатысу заңсыз" екенін ескертіп, митингіге шыққан азаматтардың " қатаң жазаланатынын" хабарлады.

  • 16x9 Image

    Пётр ТРОЦЕНКО

    Пётр Троценко - Азаттықтың Алматы бюросының тілшісі. Махамбет Өтемісов атындағы Батыс Қазақстан мемлекеттік университетінің филология факультетін тәмамдаған. Журналистік карьерасын "Уральская неделя" басылымында, "Инкар-инфо" интернет радиосында бастаған. 2007-2016 жылдары Алматыдағы, Нұр-Сұлтандағы, Оралдағы, Тараздағы және Ақтөбедегі басылымдарда жұмыс істеген. 

  • 16x9 Image

    Әсемгүл МҰХИТҚЫЗЫ

    2004 жылы Павлодар мемлекеттік университетін журналистика мамандығы бойынша тәмамдаған. "КТК-7"  телеарнасында тілші  (2003-2005), "Қазақстан-Павлодар" облыстық телеарнасында редактор, шеф-редактор (2005-2013), "Астана" телеарнасы Павлодар облысындағы меншікті тілшісі (2013-2019) болып жұмыс істеген. 2019 жылдан бері Азаттықтың Нұр-Сұлтан қаласындағы тілшісі.  

  • 16x9 Image

    Дилара ИСА

    Дилара - Азаттықтың Шымкенттегі тілшісі. 1986 жылы туған. Солтүстік Қазақстан мемлекеттік университеті мен Абай атындағы ҚазҰПУ-ді бітірген.

    "Жас Алаш" газетінде жұмыс істеген.

    Азаттықпен 2012 жылдан бері әріптес.

  • 16x9 Image

    Жаңагүл ЖҮРСІН

    Жаңагүл Жүрсін - Азаттықтың Ақтөбе облысындағы тілшісі. 1975 жылы 16 желтоқсанда дүниеге келген. 1996 жылы Қ.Жұбанов атындағы Ақтөбе университетін бітірген. Еңбек жолын Ақтөбе облыстық телевидениесінен бастап, әр жылдары осы өңірдегі түрлі БАҚ-та тілші, редактор, бас редактор қызметін атқарған. Азаттықпен 2011 жылдан бері әріптес.

ПІКІРЛЕР

XS
SM
MD
LG