Accessibility links

Қазақстанда Желтоқсан мен Жаңаөзен құрбандарын еске алды


Тәуелсіздік монументі алдында Желтоқсан мен Жаңаөзен құрбандарына құран бағыштаған азаматтар. Алматы, 16 желтоқсан 2019 жыл.

Желтоқсанның 16-сы, Тәуелсіздік мейрамы күні Қазақстанның бірнеше қаласында 1986 жылғы Желтоқсан және 2011 жылғы Жаңаөзен оқиғаларының құрбандарын еске алды. Алматыда түскі сағат 12 шамасында белсенділер "Республика" алаңындағы Тәуелсіздік монументінің түбіне гүл қойып, құрбандардың рухына құран бағыштады.

Азаттық тікелей эфирде хабар таратып жатыр:

Алматыдағы еске алу шарасына қатысқандар арасында Oyan, Qazaqstan жастар қозғалысының белсенділері, "Қазақстанның демократиялық партиясын" құру бойынша бастамашыл топ өкілдері және өзге белсенділер болды.

Еске алу шарасында Жаңаөзен оқиғасынан бері сегіз жыл өтсе де, оқиғаға әлі ресми түрде шынайы баға берілмегені, кінәлілердің жазаланбағаны айтылды. Бұл күнді мереке ретінде атап өтпеу мәселесі дау болды. Бұған қоса, шара кезінде саяси жүйені өзгерту, жемқорлықты жою, әділ сот орнату қажеттігі айтылды.

Еске алу шарасына келген Oyan Qazastan белсенділері. Алматы, 16 желтоқсан 2019 жыл.
Еске алу шарасына келген Oyan Qazastan белсенділері. Алматы, 16 желтоқсан 2019 жыл.

Нұр-Сұлтан, Шымкент және өзге қалаларда да еске алу шарасы өтті.

Нұр-Сұлтанда Абай және Республика даңғылдарының қиылысында Ашаршылық құрбандарына арналған монумент алдына жиналған тұрғындар саяси тұтқындарды босатуды талап етіп, елдегі қоғамдық-саяси жағдайға байланысты наразылық білдірді.

Шараға қатысқан тұрғындардың бірі 16 желтоқсан қарсаңында ұсталған белсенділерді қолдап келгенін айтты. Өткен аптаның басынан бері Қазақстанда жиырмадан астам белсенді "бейбіт жиын өткізу тәртібін бұзды" деп айыпталып, 5-15 тәулікке қамалған.

16 желтоқсанда Қазақстанның бірнеше аймағында белсенділердің ұсталғаны хабарланды.

Қазақстан қоғамы үшін мемлекет тәуелсіздігін жариялаған мереке күні ретінде атап өтілетін желтоқсанның 16-сы ел тарихында болған тағы екі оқиғамен маңызды. 1986 жылы желтоқсанда Мәскеудің шешіміне наразылық танытып, Алматыда бейбіт шеруге шыққан студент және жұмысшы қазақ жастарын билік күшпен таратып, кейін жүздеген адамды қуғынға салған. 2011 жылы Маңғыстау облысының Жаңаөзен қаласында бірнеше айға созылған мұнайшылар ереуіліне полиция оқ атқан. Ресми дерек бойынша, Жаңаөзен мен Шетпедегі оқиғаларда 17 адам қаза тапқан.

  • 16x9 Image

    Асылхан МАМАШҰЛЫ

    1973 жылы 22 сәуірде дүниеге келген. 1994 жылы Қорқыт ата атындағы Қызылорда пединститутын бітірген. 1997-2000 жылдары әл-Фараби атындағы Қазақ ұлттық университетінің аспирантурасында оқыған. "Қазақ энциклопедиясы" баспасында (2001-2007), республикалық "Ана тілі" газетінде (2007-2009) , "ABDI-press" орталығында (2009-2010) жұмыс істеген. 2011 жылдан Азаттық радиосының тілшісі.

    Тарихи, саяси мәселелер тақырыбында жазады, белгілі тұлғалардың саяси портреттерін жасайды. Автормен оның Facebook парақшасында да пікірлесуіңізге болады.

  • 16x9 Image

    Аян ҚАЛМҰРАТ

    Аян Қалмұрат - Азаттықтың Алматы бюросында 2017 жылдан бері тілші. Тұран университетін журналистика мамандығы бойынша тәмамдаған. Бұрындары 7kun.kz ақпарат агенттігі мен "Жас Алаш" республикалық қоғамдық-саяси газетінде жұмыс істеген. 

     

  • 16x9 Image

    Әсемгүл МҰХИТҚЫЗЫ

    2004 жылы Павлодар мемлекеттік университетін журналистика мамандығы бойынша тәмамдаған. "КТК-7"  телеарнасында тілші  (2003-2005), "Қазақстан-Павлодар" облыстық телеарнасында редактор, шеф-редактор (2005-2013), "Астана" телеарнасы Павлодар облысындағы меншікті тілшісі (2013-2019) болып жұмыс істеген. 2019 жылдан бері Азаттықтың Нұр-Сұлтан қаласындағы тілшісі.  

  • 16x9 Image

    Өркен ЖОЯМЕРГЕН

    Өркен Жоямерген 2006 жылы әл-Фараби атындағы Қазақ ұлттық университеті журналистика факультетінің бакалаврын, 2008 жылы магистратурасын тәмамдаған. Қызмет жолын "Алматы Ақшамы" газетінен бастаған. Алматы және Астана қалаларындағы бірқатар бұқаралық ақпарат құралдарында жұмыс істеген. Қазір Азаттық Радиосы Астана бюросының жетекшісі. 

    Автормен оның Facebook парақшасында да пікірлесуіңізге болады.

ПІКІРЛЕР

XS
SM
MD
LG