Accessibility links

Сұлтанов "супермаркеттегі ажиотаж" туралы суреттерге сенбеуге шақырды


Алматыдағы азық-түлік сататын гипермаркеттердің бірінде кезекте тұрған жұрт. 12 наурыз 2020 жыл.

Қазақстанның түрлі қалаларындағы "азық-түлік ажиотажынан" кейін билік өкілдері 13 наурызда Нұр-Сұлтанда баспасөз жиынын өткізіп, Қазақстанда азық-түлік қорына қатысты мәселе жоқ деп мәлімдеді.

Сауда және интеграция министрлігінің айтуынша, Қазақстан азық-түліктің негізгі түрлері бойынша ішкі нарықты өз өнімдермен қамтамасыз етіп отыр және вирус тараған елдердің әлеуметтік маңызды тауарларына тәуелді емес. Елде жарты жылға жететіндей азық-түлік қоры бар.

Азық-түлік бағасының қымбаттамайтынын айтқан сауда және интеграция министрі Бақыт Сұлтанов жұртты әлеуметтік желілерде тараған "супермаркеттегі ажиотаж" туралы суреттерге сенбеуге шақырды.

- Сауда орталықтарына көмек ретінде қаржы бөлініп отыр. Олар белгілі бір бағаны ұстап тұру міндетін алды. Мысалы, кеше (12 наурыз) Нұр-Сұлтандағы бірқатар сауда жүйелеріне қосымша бір миллиард теңге бөлінді. Сондықтан WhatsAрр-та тараған касса маңында түсірілген бір фотоға бола даурығудың қажеті жоқ. Өздеріңіз білесесіздер, егер көлденең түсірсе ондай жағдайды кез келген жерден байқауға болады, - деді Бақыт Сұлтанов.

Билік коронавирустан сақтық шараларын күшейткеннен кейін 12 наурызда Қазақстанның түрлі қалаларында дүкендерде, супермаркеттерде жұрт жаппай азық-түлік сатып алып, сауда орындарында ұзын-сонар кезек пайда болған еді.

Ауыл шаруашылық министрі Сапархан Омаровтың айтуынша, жедел штаб құрылып, азық-түлікпен қамтамасыз ету бойынша мониторинг жүргізеді. Омаров брифинг кезінде Қазақстанның батысындағы Маңғыстау өңіріне пандемия өршіп тұрған Ираннан, Әзербайжаннан жеткізілетін көкөністер мен жеміс-жидектер қауіпсіздігі туралы сұраққа да жауап берді. Оның айтуынша, бұл екі мемлекеттен импортталатын өнімдердің барлығы дәрі-дәрмекпен өңделеді.

- Біз Иранмен шекараны жапқан жоқпыз. Ғалымдардың айтуынша, азық-түлік тауарларында коронавирустың сақталу мерзімі 3-4 үш төрт күннен аспайды, - деді Сапархан Омаров.

13 наурызда Қазақстанда Германиядан келген екі азаматқа коронавирус жұққаны анықталды. Екеуі де - Қазақстан азаматтары. Денсаулық сақтау министрі Елжан Біртановтың айтуынша, олар Алматыдағы инфекциялық ауруханаға жатқызылған. Олардың жанында болған шамамен 80-нен астам жолаушы да карантинге жіберіледі. Министр олардың жағдайын жақсы деп бағалады.

Оқи отырыңыз: Covid-19 Қазақстанға да келді. Екі адамнан коронавирус табылды

Соңғы дерек бойынша, әлемде Covid-19 коронавирусы 134 мыңнан астам адамға жұққан. Қаза болғандар саны төрт мыңнан асып кетті. Вирус 110-нан астам елден табылды. 68 мыңға жуық адам дерттен сауыққан.

Қазақстанмен көрші Ресейде 28 адамға вирус жұққан. Ресей билігі наурыздың 13-інен бастап Италия, Германия, Франция мен Испанияға ұшатын әуе рейстерінің саны қысқаратынын хабарлады.

  • 16x9 Image

    Сәния ТОЙКЕН

    Сәния Тойкен Азаттық радиосында 2007 жылдан бері жұмыс істейді. ҚазҰУ-дің журналистика факультетін бітірген. Республикалық  "Қазақстан пионері", "Жас Алаш" газеттерінде тілші болған. Қазақстан Республикасы Жекешелендіру жөніндегі комитетінің баспасөз хатшысы қызметін атқарған. Атырау облыстық "Ақ Жайық" газетінде  тілші, қазақ редакциясының редакторы, Маңғыстау облысында шығатын "Не хабар?!" апталығының редакторы болып жұмыс істеген. 

    Сәния Тойкен 2017 жылы журналист әйелдердің халықаралық қоры (IWMF) тағайындаған "Журналистикадағы батылдығы үшін" сыйлығын иеленді. Ол - бұл беделді сыйлықты алған алғашқы қазақстандық журналист.

ПІКІРЛЕР

XS
SM
MD
LG