31 наурызда Азаттық сайтында туғанынан естімейтін, сөйлей алмайтын қызылордалық ерлі-зайыпты Асхат Ахметов пен Гүлшара Исмағұлова туралы видео шықты. Видео жарияланғаннан кейін бір күннен соң еріктілердің баспанаға зәру көп балалы отбасыға ақша жинап, үй алып бергені белгілі болды.
Қайырымдылық акциясын ұйымдастырған астаналық ерікті Дәулет Төлеутайұлының айтуынша, ақша жинауға Азаттық видеосы түрткі болған.
- Өзім жатар алдында позитивті нәрселер көруге тырысамын. Азаттық видеосын көргеннен кейін біраз ұйықтай алмай жаттым. Ересектер ештеңе емес, көбіне балаларды аяймын. Әділханның (ерлі-зайыптының 13 жастағы баласы) жасағаны ерлік қой. Әкемнің естіп, сөйлей алмайтынын 4 жасымда білдім деп отыр. Оның айтқандары шынымен де жүрекке жетті, - дейді Дәулет Төлеутайұлы Азаттық тілшісіне.
Осыдан соң ол әлеуметтік желідегі оқырмандарына видеоны көрсетіп, "үй алып беру жайлы" идея айтқан. Оқырмандар бірден қолдаған. Осыдан соң интернетте ақша жинау басталған.
"10 сағат ішінде он миллион теңге жиналды. Ақша жинағандар - сіз бен біз сияқты қарапайым адамдар. Бай, ауқатты емес" дейді ол.
Азаттықтың Қызылордадағы тілшісінің айтуынша, баспаналы болатынын естіген кезде көп балалы отбасы сенер-сенбесін білмей қуанған. 2 сәуірде олар Қызылордадан 8 700 000 теңгеге үй тауып, үй иесімен сату-сатып алу туралы келісім жасауға кіріскен.
Жаңа бес бөлмелі жер үй Қызылорданың Әл-Фараби ықшам ауданында орналасқан. Үй қала шетінде орналасса да үйде газ, су бәрі бар. Бұған дейін де Азаттықта шыққан материалдардан кейін кейбір отбасылар баспаналы болған.
Көп балалы отбасы туралы Азаттық видеосын көріңіз (31 наурыз 2020 жыл):
ПІКІРЛЕР