Accessibility links

Әкімдік: 3 мың гектар егістікті су алды, ондаған үй жарамай қалды


Мақтарал ауданындағы су алған ауылдардың бірі. 2 мамыр 2020 жыл.

Түркістан облысы Мақтаарал ауданының бірнеше елді мекенін су алып, ондаған үй жарамсыз болып қалды, 3 мың гектар егістік және Жеңіс пен Жаңа тұрмыс ауылдарын толық су алды. Бұл туралы 2 мамырда кешке қарай Түркістан облысы әкімдігінің баспасөз қызметі хабарлады. Ресми орындар "әзірге адам және мал шығыны белгісіз" деді.

"5460 адам эвакуацияланды. 3 мыңға жуық адам 10 мектепке жайғастырылды. Қалғаны туған-туыстарына кетті. Мектептерде тамақ, жатын орын, карантинге байланысты қауіпсіздік шаралары сақталып жатыр" деді әкімдік өкілдері.

1 мамырда Мақтарал ауданына жақын Өзбекстанда Сардоба су қоймасы жарылып, айналасындағы елді мекендерді су алған еді. Кейінірек Түркістан облысы Мақтаарал ауданындағы бірнеше елді мекенге де су алу қаупі төніп, кейбір тұрғындар өз бетімен, кейбірі жергілікті әкімдік көмегімен ауылдардан көшірілген. 2 мамырға қараған түні ауданда төтенше жағдай жарияланды.

Сенбі күні оқиға орнына барған Азаттық тілшісі үйлер мен қоралардың су астында қалғанын, ірі қара малдардың, жылқылардың суға кеткенін көрді. Сенбі күні түстен кейін Мақтарал ауданы әкімдігінің алдына он шақты тұрғын жиналып, су алған кейбір ауылға көмек келмегеніне шағымданған. Олар су шайған ауылдан өз бетімен қашып шыққанын айтқан. Ал әкімдік бұл ақпаратты жоққа шығарған.

Оқи отырыңыз: Мақтарал ауданында елді мекендерді су алып, төтенше жағдай жарияланды

Президент Қасым-Жомарт Тоқаев сенбі, 2 мамырда зардап шеккен отбасыларға көмек көрсетілетінін мәлімдеді.

Өзбекстандағы Сардоба су қоймасы 2017 жылы салынған. Сыйымдылығы – 922 млн текше метр. Су қоймасының биіктігі – 28,8 метр.

  • 16x9 Image

    Дилара ИСА

    Дилара - Азаттықтың Шымкенттегі тілшісі. 1986 жылы туған. Солтүстік Қазақстан мемлекеттік университеті мен Абай атындағы ҚазҰПУ-ді бітірген.

    "Жас Алаш" газетінде жұмыс істеген.

    Азаттықпен 2012 жылдан бері әріптес.

ПІКІРЛЕР

XS
SM
MD
LG