Accessibility links

"Көше партиясы": Соттың белсенділер шағымын қабылдамауының себебі белгілі болды


Белсенділер ұстап тұрған "Көше партиясы" туралы баннер. Ақпан айы, 2020 жыл.

12 маусымда адвокат Ғалым Нұрпейісов Нұр-Сұлтандағы Есіл аудандық сотының тіркелмеген "Көше партиясы" қозғалысын "экстремистік ұйым" деп тану туралы шешіміне белсенділердің түсірген апелляциялық шағымының қабылданбағаны туралы ресми жауап алды. Бұл туралы Азаттыққа адвокаттың өзі хабарлады.

Мамыр айының соңында "Көше партиясын" экстремистік ұйым деп тану туралы сот шешімімен келіспеген бірнеше белсенді сотқа шағым түсірген еді, кейінірек олардың шағымы қабылданбағаны хабарланды.

Белсенділер Болат Смағұлов, Ноян Рахымжанов, Нұрсұлтан Тастаев, Асқар Қайырбек, Айдос Өмірбеков, Айбек Сәбитов, Айдар Сыздықов, Асхат Жексебаевтың апелляциялық шағымын кері қайтару туралы сот анықтамасында "олардың іс бойынша тараптарға жатпайтыны немесе қатысушылары болмағандықтан кері қайтарылғаны" жазылған. Сот қаулысына Есіл аудандық сотының төрағасы Руслан Мәжитов қол қойған.

Адвокат сот анықтамасына арызданатындарын айтады.

- Сот анықтамасына әрине біз шағымданамыз. Бірақ билік сот шешімі мен іс материалдарын ашып көрсеткісі келмейді. Міне, мәселе осында болып тұр,- дейді Нұрпейісов.

19 маусымда Есіл ауданы соты бас прокуратура өтінішімен тіркелмеген "Көше партиясы" қозғалысын елде экстремистік деп танылған "Қазақстанның демократиялық таңдауы" (ҚДТ) қозғалысымен бір ұйым деп танып, қызметіне тыйым салған еді.

"Сот ҚДТ қозғалысы өз атауын "Көше партиясына" ауыстырғанын анықтады және екеуі де бір экстремистік ұйым деп таныды. Сот ҚДТ қозғалысының Қазақстан аумағында "Көше партиясы" деген жаңа атпен жұмыс істеуіне тыйым салды. Азаматтық-процессуалдық кодекстің 243-бабына сай, бұл сот шешімі тез арада күшіне енеді" деп бас прокуратура шағымының себебін ресми сайтында солай көрсеткен.

Бас прокуратура Қазақстанда ҚДТ және "Көше партиясының" қызметіне тыйым салып, екі ұйымның жұмысына араласқандар жауапқа тартылатынын ескерткен болатын.

27 мамырда бір топ белсенді адвокат Ғалым Нұрпейісовке сенімхат беріп, сот шешіміне келіспейтіндіктерін білдіріп, апелляциялық арыз түсірген еді.

Былтырдан бері республиканың әр қаласында өздерін тіркелмеген «Көше партиясы» қозғалысының мүшесімін деп санайтын азаматтық белсенділер жиі наразылық акциясына шығып, адам құқықтары мен сөз бостандығы, митингіге қатысты талаптар қойып келеді. Құқық қорғау органдары оларды үнемі ұстап, түрлі әкімшілік жазаға тартқан.

Қазақстан соты "экстремистік" деп таныған ҚДТ-ны Еуропарламент 2019 жылғы наурыз айындағы қарарында "бейбіт оппозициялық қозғалыс" деп атаған. Оның жеткшісі оппозициялық саясаткер Мұхтар Әблязов ҚДТ туралы сот шешімнің саяси астары бар деп санайды.

  • 16x9 Image

    Сәния ТОЙКЕН

    Сәния Тойкен Азаттық радиосында 2007 жылдан бері жұмыс істейді. ҚазҰУ-дің журналистика факультетін бітірген. Республикалық  "Қазақстан пионері", "Жас Алаш" газеттерінде тілші болған. Қазақстан Республикасы Жекешелендіру жөніндегі комитетінің баспасөз хатшысы қызметін атқарған. Атырау облыстық "Ақ Жайық" газетінде  тілші, қазақ редакциясының редакторы, Маңғыстау облысында шығатын "Не хабар?!" апталығының редакторы болып жұмыс істеген. 

    Сәния Тойкен 2017 жылы журналист әйелдердің халықаралық қоры (IWMF) тағайындаған "Журналистикадағы батылдығы үшін" сыйлығын иеленді. Ол - бұл беделді сыйлықты алған алғашқы қазақстандық журналист.

ПІКІРЛЕР

XS
SM
MD
LG