Accessibility links

"Мемлекеттік құпияны ашты" деп сотталған ҰҚК экс-басшысы Дүтбаев түрмеден босады


Қазақстан ұлттық қауіпсіздік комитетінің экс-басшысы Нартай Дүтбаев

Қазақстан ұлттық қауіпсіздік комитетінің экс-басшысы Нартай Дүтбаев бүгін, 18 маусымда шартты түрде бостандыққа шықты. Бұл туралы Азаттыққа жағдаймен таныс дереккөз айтты. Ақпаратты Шығыс Қазақстан облысы (ШҚО) қылмыстық атқару жүйесі департаменті растады. Дүтбаев отырған ШҚО Жарма ауданы Шуақ кентіндегі ОВ-156/17 түрмесіндегілер “ол 18 маусымда сот шешімі күшіне енген соң бостандыққа шығып, Алматыға кетуі тиіс болған” деді. Дүтбаевтың шартты түрде босап шығуының себебі айтылмады.

Нартай Дүтбаев ҰҚК-ны 2001 жылдың желтоқсанынан 2006 жылдың ақпанына дейін басқарды. Кейін қастандықпен өлтірілген оппозициялық саясаткер Алтынбек Сәрсенбайұлы мен оның екі көмекшісінің қазасына ҰҚК-ның “Арыстан” арнайы бөлімінің қатысы бары белгілі болған соң отставкаға кетті.

2016 жылы желтоқсанда Дүтбаев “мемлекеттік құпияны ашты” деген күдікпен ұсталған. 2017 жылы тамызда Ақмола гарнизонының әскери соты оны “мемлекеттік құпияны ашты” және “қызметін асыра пайдаланды” деп 7,5 жылға соттады. 2018 жылы қаңтарда дәл осы сот оны “ақша жымқырды” деп айыптады. Сот екі жазаны біріктіріп, Дүтбаевты 12 жылға бас бостандығынан айырды.

2018 жылы күзде Дүтбаев “ТуранӘлем” банкі басқармасының экс-басшысы Ержан Тәтішевтің өліміне байланысты сотта куәлік етті. Бұл сот бойынша бұрынғы банкир, қазір шетелде тұрып жатқан оппозициялық саясаткер Мұхтар Әблязов айыпталған еді. Дүтбаев өз сөзінде Әблязов пен Тәтішев арасында “мүлікке байланысты келіспеушілік болды” деген.

2019 жылы қаңтарда Жоғарғы соттың қылмыстық істер бойынша кассация алқасы бас прокуратураның шағымын қанағаттандырып, Дүтбаевтың түрме жазасын 12 жылдан 11 жылға қысқартқан.

ПІКІРЛЕР

XS
SM
MD
LG