Алматыда 1957 және 1960 жылы туған екі ер адам коронавирустан қайтыс болды. Өлім-жітімді зерттеу комиссиясы марқұмдардың қайтыс болуына COVID-19 дерті себеп болды деген шешім қабылдаған.
Қазақстанда коронавирустан барлығы 120 адам көз жұмған. Нұр-Сұлтан (32), Алматы қаласы (20) және Павлодар облысы (13), Шымкент қаласында (13) адам өлімі көп тіркелген.
18 маусымда денсаулық сақтау вице-министрі Ләззат Ақтаева коронавирустан қайтыс болғандар тізіміне кірмеген 54 өлім тіркелгенін айтқан. Оның айтуынша, бұл науқастар коронавирус жұқтырғанмен "инфаркт, инсульт, онкологиялық аурулар секілді өзге негізгі дерттерден қайтыс болған". Ал Дүниежүзілік денсаулық сақтау ұйымы әлем елдеріне коронавирус жұқтырған марқұмдарды (жазатайым оқиғадан және инфарктен қайтқандардан басқасын) ресми статистикаға қосуды ұсынған.
Елде соңғы уақытта күніне кемінде мың адамнан вирус табылып жатыр. Нұр-Сұлтан, Алматы және бірқатар аймақтарда инфекциялық стационарлар толды, кейбір науқастар ауруханаға қабылдамай жатқанына шағымданған. Денсаулық сақтау саласы мамандары тек жағдайы ауыр науқастарды ғана ауруханаға жатқызатынын мойындаған.
Соңғы уақытта елде коронавирусты анықтайтын тестен өту де қиындаған. Кейбір аймақтарда пневмонияға шалдыққандар артқан.
Эпидемиологиялық ахуалдың нашарлауына байланысты Нұр-Сұлтан мен Алматы қаласында сенбі, жексенбі күндері қоғамдық көлік тоқтап, сауда орталықтары, базарлар жабылды. Нұр-Сұлтан әкімдігінің хабарлауынша, қалада жеке көлік қозғалысы да шектелген.
ПІКІРЛЕР