Accessibility links

live Қазақстанда Covid жұқтырғандар 93,8 мыңнан асты, 1091 адам қайтыс болды

COVID-19 індеті жайлы әлемдегі және Қазақстандағы ақпараттарды шолып шығыңыз.


Ақтөбедегі коронавирус жұқтырған науқастар жатқан аурухананың медқызметкерлері. Көрнекі сурет.

Негізгі деректер

Әлемде COVID-19 коронавирусы 18 миллион астам адамға жұқты. Қайтыс болғандар 690 мыңнан асты. 10,8 миллионнан астам адам жазылды.

Дүниежүзілік денсаулық сақтау ұйымы Қытайдан тараған бұл вирусты "пандемия" деп жариялаған. Коронавирус жайлы қаңтардың басында белгілі болды. Оны алғаш жұқтырғандар Қытайдың Хубэй провинциясының Ухань қаласында тіркелді. Вирус тыныс алу жолын зақымдап, пневмонияны өршітеді. Бұл дерттің көбіне егде жастағылар мен созылмалы ауруы бар адамдарға салдары ауыр болуы мүмкін.

11:56

Денсаулық министрлігі: Қазақстанда коронавирустан қайтыс болғандар 1 091 адамға жетті

Қазақстанда коронавирустан барлығы 1 091 адам қайтыс болды. Бұл туралы 4 тамыз күнгі үкімет отырысы кезінде денсаулық сақтау министрі Алексей Цой хабарлады.

"3 тамыз күнгі мәлімет бойынша Қазақстанда барлығы 93 820 адамға коронавирус инфекциясы жұққан. Олардың 27 597-і емделіп жатыр, 65 132 адам жазылған, 1 091 адам қайтыс болған" деді министр.

Денсаулық сақтау министрі Алексей Цой.
Денсаулық сақтау министрі Алексей Цой.

Ведомство 2 тамызда кешке қарай 1 058 адам қайтыс болды деп мәлімдеген еді, осылайша қысқа уақыт аралығында Covid-тен қайтыс болғандар саны 33 адамға көбейген. Бұл статистикаға коронавирус анықталған қайтыс болған жүздеген адам өлімі енбеген. Арнайы комиссия олардың "коронавирустан емес, ілеспе аурулардан қайтыс болғанын" айтады. Елде ресми дерекке күмән келтіретіндер де бар.

Бұған дейін денсаулық сақтау министрлігі тамыздан бастап белгілері коронавирусқа ұқсайтын пневмонияға шалдыққандарды және одан қайтыс болғандарды нөлден бастап жаңадан есептеп, күн сайын жариялап отыратынын айтқан еді. Соңғы мәлімет бойынша, бірнеше күн ішінде осындай ауруға шалдыққан 5 979 науқас анықталған, 51 адам пневмонияның сол түрінен қайтыс болған. 1 тамызға дейін тіркелген науқастар бұл есепке енбеген. Министрлік олардың арасында "коронавирусқа ұқсайтын" пневмониямен қатар өзге түрлеріне шалдыққандар болғандықтан оларды жаңа есепке қоспайтынын айтқан. Ведомство 3 тамыз күнгі "пневмония статистикасын" әзірге жарияламады.

Қазақстанда 5 шілдеде коронавирус індетіне байланысты карантин шаралары қайта күшейіп, өткен аптада тағы екі аптаға - 16 тамызға дейін ұзартылған болатын.

09:45

Қазақстанда өткен тәулікте 1 158 адамнан коронавирус анықталған

Өткен тәулікте елде 1158 адамнан коронавирус табылған. Бір күнде 2 621 адам жазылған. Денсаулық сақтау министрлігі белгілері коронавирусқа ұқсайтын пневмонияға шалдыққандар туралы мәліметті жариялауға уәде бергенмен әзірге жаңа дерек жарияланған жоқ.

Нұр-Сұлтан (220) мен Алматы (178) қалаларында коронавирус жұққан науқастар әлі азаймай отыр. 3 тамызда Шығыс Қазақстан облысында 124 адамға вирус жұққаны анықталған. Қалған облыстарда жаңадан анықталған науқастар саны жүзден аспайды.

Денсаулық сақтау министрлігінің мәліметінше, елде коронавирус жұққандар 93 820 адамға жеткен. Шамамен 65 мыңы жазылған. Ресми мәлімет бойынша, 1058 адам коронавирустан қайтыс болған. Соңғы аптада (27 шілде – 2 тамыз) 265 адам көз жұмған.

Ресми мәлімет бойынша, 1 тамыздан бері Қазақстанда 5 979 адам белгілері коронавирусқа ұқсайтын пневмонияға шалдыққан. 51 адам пневмонияның сол түрінен қайтыс болған. Биыл 1 қаңтар мен 2 тамыз аралығында 256 541 адам пневмонияға (барлық түрі) шалдыққан. Маусым айында - 32 мың, шілде айында шамамен 157 мың адам ауырған.

08:53

BBC: Иран коронавирустан қайтыс болғандар туралы мәліметті айтарлықтай кемітіп көрсеткен

Иран үкіметі коронавирус жұққандар мен одан қайтыс болғандар туралы мәліметті айтарлықтай кемітіп көрсеткен. Британдық BBC сайтына анонимді түрде жіберілген үкімет құжаттары осыны көрсеткен.

Құжаттардағы мәліметке сәйкес, 20 шілдеге дейін Иранда коронавирустан 42 мың адам қайтыс болған. Алайда Иран денсаулық сақтау министрлігі осы уақыт аралығында 14 405 адамның ғана вирустан көз жұмғанын хабарлаған.

BBC сайтына анонимді түрде жіберілген құжаттарда ауруханаға түскендердің аты-жөні, жасы, жынысы, симптомдары және ауруханада емделу ұзақтығы сияқты мәліметтер көрсетілген. Онда сонымен бірге науқастардың жағдайы да сипатталған. BBC сайты бұл деректердің емделген және қайтыс болған науқастар туралы ақпаратпен сәйкес келетінін айтады.

Иран – эпидемияның алғашқы кезеңінде коронавирустан көбірек зардап шеккен елдердің бірі. Бұған дейін Иран үкіметі жариялаған мәліметтерге күмән де болған. BBC сайтының жазуынша, құпия дереккөзі жіберген құжаттар Иран үкіметінің вирус жұққан науқастар санын айтарлықтай кемітіп көрсеткенін дәлелдеген. Бұған дейін халықаралық сарапшылар Қытай үкіметі жариялаған коронавирус мәліметіне де күмән келтірген.

Иран үкіметінің мәліметінше, эпидемия басталғалы бері елде 312 мыңнан астам адамға коронавирус жұққан. 270 мыңнан астамы жазылған. 17 405 адам қайтыс болған.

08:18

Қырғызстанда 101 жастағы қария коронавирустан жазылды

Қырғызстанда коронавирустан жазылғандар қатарында 101 және 80 жастағы екі қария да бар. Бұл туралы Қырғызстанның денсаулық сақтау министрлігі хабарлады.

"Бұл медицина қызметкерлерінің күш-жігері мен еңбегінің нәтижесі деп айтуға болады" деді министрлік өкілі Айнур Акматова 3 тамыз күнгі брифинг кезінде.

Қырғызстанда барлығы 37 129 адамға коронавирус жұққан. 27 927 адам айыққан. 1420 адам қайтыс болған. Қазір ауруханада 7 792 науқас емделіп жатыр. Олардың ең көбі Бішкек пен Ош қалаларында жатыр.

Қырғызстан шілде айының ортасынан бастап Covid жұққандар (U07.1) мен белгілері коронавирусқа ұқсайтын пневмонияға (U07.2) шалдыққандарды бірге есептей бастаған.

Тағы

ПІКІРЛЕР

XS
SM
MD
LG