Токиода өтіп жатқан олимпиада ойындарында бокстан 52 келіде қазақстандық боксшы Сәкен Бибосынов жартылай финалда ұлыбританиялық Джамал Яфайдан жеңіліп, финалға шыға алмады - 2:3. Бірінші раундта Яфай қазақстандық боксшыны нокдаунға жіберді.
Осылайша Қазақстан боксшылар алғаш рет олимпиадада финалсыз қалды. 1996 жылдан бергі олимпиадада Қазақстан бокстан кем дегенде бір алтын алатын. Токиода Қазақстан боксшылары Сәкен Бибосынов пен Қамшыбек Қоңқабаев қола медаль иеленді.
Осыған дейін +91 келіде Қамшыбек Қоңқабаев жартылай финалда америкалық Ричард Торрезден жеңілген. Олимпиадада жартылай финалда жеңілген боксшылар қола медаль иеленеді.
Қазақстаннан Токио олимпиадасына тоғыз боксшы жолдама алған. Қазақстан үміт артқан Василий Левит (Рио олимпиадасының күміс жүлдегері), Бекзат Нұрдәулетов (2019 жылғы әлем чемпионы), Абылайхан Жүсіпов, Серік Теміржанов, Закир Сафиуллин, Аманхан Әлімқұл, әйелдер боксынан Надежда Рябец жартылай финалға шыға алмады.
Тоғыз боксшы, тоғыз үміт, тоғыз жеңіліс. Қазақстан бокстан олимпиадада алтынсыз қалды
Қазір Қазақстанда Токио олимпиадасының бес қоласы бар. Бокстан екі қола медальдан бөлек дзюдошы Елдос Сметов, ауыр атлеттер Зүлфия Чиншанло мен Игорь Сон олимпиадада үшінші орын алған.
ПІКІРЛЕР