"Қазақстан темір жолы" ұлттық компаниясының баспасөз хатшысы Қайсар Жұмабайұлы Facebоok желісіндегі парақшасында Жамбыл облысындағы жағдайға байланысты бірқатар пойыздың кешігетінін хабарлады.
Оның ішінде Алматы-2 – Атырау, Алматы-2 – Шымкент, Маңғыстау - Алматы-2, Ақтөбе – Алматы-1, Шымкент – Алматы-2, Түркістан – Алматы-2, Сарыағаш – Нұр-Сұлтан-1, Қызылорда – Семей бағытындағы жолаушылар пойызы бар.
Жамбыл облысының әкімдігі Тараз тұрғындарынан үйден шықпауды және терезеге жақындамауды сұрады. Индустрия және инфрақұрылымдық даму министрлігі жарылысқа байланысты Тараз маңындағы автокөлік жолдарына шектеу қойылғанын хабарлады.
Жамбыл облысы әкімдігінің хабарлауынша, апат болған жерге баратын жолдардың бәрі, соның ішінде теміржол уақытша жабылды. Қоғамдық тәртіпті қорғау және тонаудың алдын алу мақсатында эвакуацияланған елді мекендерді патрульдеу ұйымдастырылды.
Облыс әкімі Бердібек Сапарбаевтың басқаруымен жедел штаб құрылды.
"Алматы-Тараз", "Тараз-Алматы" жолдарын облыстық жол полициясы экипаждары бақылауға алды.
Әкімдік: Жарылыстан қаза тапқандар жоқ, 60 адам жараланды
Тараз маңындағы әскери қоймада болған жарылыстан қаза тапқандар жоқ. Бұл жөнінде Жамбыл облысы әкімдігінің баспасөз қызметі "Интерфакс-Қазақстан" агенттігіне хабарлаған. Әкімдіктің мәліметінше, оқиғадан 60 адам жапа шеккен, оның 11-і әскери адам. Жараланғандардың барлығы Тараздағы №1 қалалық ауруханаға жеткізілген.
Әкімдіктің хабарлауынша, өртпен күресіп, оқиға орнында тәртіпті қамтамасыз ету мақсатында Жамбыл облыстық полициясының 300 адамнан тұратын жеке құрамы, әскери бөлімшенің 500 адамнан тұратын жеке құрамы түгел жұмылдырылған.
Жамбыл облысы әкімінің орынбасары Дәулет Кәрібек жергілікті ақпарат құралдарына берген сұхбатында Тараз қаласына, Байзақ ауданының орталығына төніп тұрған қауіп жоқ деп мәлімдеді. Бұған қоса ол қоймадағы жарылыстың саябырсығанын айтты. "40-45 минут аралығында бірде-бір дүмпу болған жоқ" деді Дәулет Кәрібек.
ПІКІРЛЕР