26 тамызда кешкі сағат 19 шамасында Жамбыл облысы Байзақ ауданындағы 28349 әскери бөлімі аумағында жарылыс болып, кемі 32 адам зардап шекті. Бұл жөнінде Қазақстан қорғаныс министрлігінің баспасөз қызметі хабарлады. Бұл бөлім Жамбыл облысының орталығы Тараз қаласынан 18 километр қашықтықта орналасқан.
Қорғаныс министрлігі дерегінше, қоймада инженерлік оқ дәрі сақталады, бірақ олар алыс қашыққа ұша алмайды. Бірақ сонда да жақын маңдағы ауылдардың тұрғынын қауіпсіз жаққа көшіру туралы шешім шыққан.
Жамбыл облысы әкімдігінің мәліметі бойынша, 250 тұрғыны бар Қайнар ауылы оқиға орнынан 1 километрге жетпейтін қашықтықта орналасқан. Халықты эвакуациялау басталды.
"Жақын маңдағы Базарбай, Үш-Бұлақ, Жаңатұрмыс ауылдарының тұрғындары эвакуацияланып жатыр" делінген әкімдіктің баспасөз хабарламасында.
Оқиға орнына 16 жедел жәрдем бригадасы жіберілген. Тараздың №1 қалалық ауруханасына түрлі жарақат алған 32 адам жеткізілген.
Қазақстан президенті Қасым-Жомарт Тоқаев Жамбыл облысындағы әскери қоймадағы жарылысқа байланысты қылмыстық іс қозғалғанын хабарлады. Ол Twitter парақшасында "жедел штаб құрылғанын, ТЖМ, ІІМ бөлімшелері жұмылдырылғанын, теміржол қатынасы уақытша тоқтатылғанын" жазды.
Қазақстан президенті Қасым-Жомарт Тоқаев Twitter парақшасында "Жамбыл облысына қорғаныс, төтенше жағдайлар министрлері, ішкі істер министрінің орынбасары ұшып кетті. Жақын маңдағы ауыл тұрғындарын эвакуациялау туралы шешім қабылданды. Облыстық ТЖ Департаментінің 30-ға жуық қызметкері мен әскери қызметшілер жарақат алды" деп жазды.
ПІКІРЛЕР