АҚШ президенті Джо Байден Ресей басшысы Владимир Путинмен телефонмен сөйлесіп, Украина төңірегіндегі мәселені талқылады. Бұл жөнінде Ақ үй мәліметіне сүйенген Associated Press агенттігі хабарлады.
Ақпаратқа қарағанда, Мәскеу уақытымен кешкі сағат 7-де басталған келіссөз екі сағатқа созылған. Кремль жақында келіссөз туралы бастаманы Америка тарабының көтергенін хабарлаған. Ақ үйдің айтуынша, Путин дүйсенбі күні сөйлескісі келген, алайда Байден келіссөзді ертерек өткізуге көндірген.
Ақ үйдің хабарламасына сәйкес, президент Байден Путинге егер Мәскеу Украинамен жағдайды ушықтырса, Вашингтон жылдам әрі батыл әрекет ететінін ескерткен.
Украина төңірегіндегі жағдай ушыққан шақта екі ел басшысы сөйлесіп отыр. Таяуда Байденнің ұлттық қауіпсіздік жөніндегі кеңесшісі Джейк Салливан Ресей Украинаға Пекиндегі қысқы Олимпиада ойындары өтіп жатқан шақта басып кіруі мүмкін деп мәлімдеген.
АҚШ басшылығы жұма күні азаматтарына Украинадан екі тәулік ішінде жылдам кетуге кеңес берген. Ізінше мұндай нұсқаулықты Жапония, Ұлыбритания, Еуроодақтың бірқатар елдері, Австралия, Канада, Марокко, Израиль – барлығы 30 мемлекет әзірлеп жариялады. The Guardian басылымының жазуынша, Ұлыбритания Украинадан әскери инструкторларын эвакуациялайды. АҚШ мемлекеттік департаменті және Ресей сыртқы істер министрлігі дипломаттарының бір бөлігіне елден кетуге кеңес берген.
Сенбі күні Путин Франция президенті Эммануэль Макронмен де сөйлесті. Әңгіме бір жарым сағатқа созылған. Макрон кеңсесінің хабарлауынша, президент Путинге жағдайды ушықтыруға жол бермеу қажеттігін айтқан.
Кремль хабарламасында Ресей "Украинаға басып кіреді" деген "арандату сипатындағы спекуляция" талқыланғаны жазылған. Мәскеу әскери операцияға дайындықты түбегейлі жоққа шығарады.
ПІКІРЛЕР