Қазақстан ішкі істер министрлігі де, қылмыстық-атқару жүйесі комитеті де Қаңтар оқиғасына байланысты қамалғандардың тергеу изоляторында азапталғаны жайлы хабарды жоққа шығарады. Бірақ абақтыда азапталдық дегендер көп. 30 жастағы Жасұлан Амангелдинов 5 қаңтарда жұмыстан үйіне қайтып бара жатқанда көзіне оқ тиіп жараланғанын айтады. Әуелі ауруханаға түсіп, кейін тергеу изоляторына қамалған. Екі апта бұрын қолхатпен шыққан азамат төртінші операциясын күтіп отыр. Жағы сынып, бір құлағының дыбыс жарғағы жарылған, бір көзі көрмей қалған азамат "мені абақтыда азаптады" дейді.