Accessibility links

АҚШ Дмитрий Песковтың әйелі мен ересек балаларына санкция салды


Дмитрий Песков.
Дмитрий Песков.

АҚШ Ресей президентінің баспасөз хатшысы Дмитрий Песковтың әйелі мен оның ересек балаларына санкция салды. Бұл жөнінде АҚШ мемлекеттік департаментінің ресми өкілі Нед Прайс хабарлады.

Ол Ресей президенті Владимир Путин агрессиясын тоқтатпайынша шектеу шаралары үдей беретінін айтты.

"Ресей мемлекеттік думасының 12 мүшесіне санкция салып отырмыз. Олар Донецк және Луганск халық республикалары деп аталатын [сепаратистік құрылымдарды] мойындау процесіне жетекшілік еткен. Бұған қоса, Кремль өкілі Дмитрий Песковтың әйелі мен ересек балаларына санкция салынады" деді ол.

Песковтың өзі бұған дейін АҚШ пен Еуроодақтың санкциясына ілінген.

Песков ресейлік спортшы, мәнерлеп сырғанаушы Татьяна Навкаға үйленген. Песковтың бес баласы бар: бұрынғы әйелі Екатерина Солоцинскаядан ұлы Николай (1990 жылы туған), Елизавета (1998 жылы туған), Мика (2004 жылы туған) және Дени (2008 жылы туған) туған. Ал Татьяна Навкадан Надежда атты қызы бар.

Forbes мәліметі бойынша, Татьяна Навка 2018 жылы 218 млн рубль ақша тапқан. Ал отбасының кірісі 231 млн рубльді құрайды.

Песковтың қызының компаниясы "Сперанса ДС" 2020 жылы шілдеде Visit Moscow тауар белгісін патенттеуге өтініш берген. Аталған компания 2017 жылы құрылған, бастапқыда "Артмак" деп аталған. 2020 жылы 30 сәуірде Елизавета Пескова "Артмактың" жалғыз иесі атанып, бірден компанияның атын өзгертті. Заңды тұлғалардың мемлекеттік реестріндегі ақпаратқа сәйкес, компания туризм, жарнама және қоғамдық пікірді зерттеумен айналысты.

ПІКІРЛЕР

XS
SM
MD
LG