Accessibility links

Қазақстанда қазақтардың үлесі 69,6 пайыз болды


Көшеде кетіп бара жатқан жұрт.
Көшеде кетіп бара жатқан жұрт.

Қазақстанда бір жыл ішінде қазақтардың үлесі 0,6 пайызға (80 мың адам) өсіп, 2022 жылдың басында 69,59 пайызға жеткен. Ұлттық бюро статистикасының жыл сайынғы бюллетеніне сүйенген "Власть" сайты осылай жазды. Елде қазақтардың жалпы саны 13,3 млн адам болды.

Ақпаратқа қарағанда, Тәуелсіздік жылдары республикада қазақтардың саны жуықтап алғанда екі есеге өсіп (Совет одағында 1989 жылы жүргізілген халық санағы бойынша 39,7%), 69,59 пайызға жеткен.

Қазір бес аймақта қазақтардың үлесі 80 пайыздан көп: Нұр-Сұлтан (81,08%), Ақтөбе облысы (84,29%), Маңғыстау облысы (91,57%), Атырау облысы (93,01%) және Қызылорда облысы (96,54%). Солтүстік Қазақстаннан басқа аймақтардың барлығында-дерлік қазақтардың үлесі басым. Солтүстік Қазақстанда орыстардың үлесі (49 пайызы – орыстар, 35 пайызы – қазақтар) көбірек.

Ұлттық бюро статистикасының мәліметі бойынша, былтыр тағы бірнеше этностың үлесі артқан. Атап айтқанда, бір жылда өзбектер 17,6 мыңға көбейіп, 637,9 мыңға жеткен. Этнос құрамы жағынан өзбектер үшінші орында тұр. Олар көбіне Түркістан облысы мен Шымкентке шоғырланған.

Ұйғырлар бір жылда 4,2 мыңға көбейіп, 283,1 мыңға жеткен. Әзербайжан (116,7 мың), түрік (116,2 мың), дүнген ( 78,2 мың), тәжіктердің (53,4 мың) де үлесі артқан.

Қазақстанда орыстар саны бір жылда 48,5 мыңға азайған, қазір елде 3 млн 430 мың орыс тұрады. Қазір олардың үлесі жалпы халықтың 17,94 пайызына тең.

Қазақстанда соңғы жылда украиндардың үлесі азайған. Қазір елде 247 мың украин бар.

Былтыр 1 қыркүйек пен 30 қазан аралығында жүргізілген Ұлттық халық санағының алғашқы нәтижесі бойынша, Қазақстан халқы 19 169 550 адамға жеткен. Ол кезде қазақтардың үлесі 70,18 пайызға жеткені айтылған еді.

2009 жылғы халық санағында қазақтардың үлесі 63,1 пайыз болған.

ПІКІРЛЕР

XS
SM
MD
LG