1-2 мамырда Украинаның Мариуполь қаласынан бейбіт тұрғындар эвакуациялана бастады. 1 мамырда "Азовсталь" зауытының ішінен жүзге жуық адам шығарылды. Бұдан бөлек, қаланың өзінен де біраз адам эвакуацияланып жатыр.
Мариупольде адам төзгісіз жағдайда қалған бейбіт тұрғындар қалай эвакуацияланып жатыр?
Мариупольден бейбіт тұрғындарды эвакуациялау басталды
Мариуполь мэрінің кеңесшісі Петр Андрющенко Азаттықтың Украина қызметіне қаладан бейбіт тұрғындарды эвакуациялау басталды деп мәлімдеді.
Оның сөзінше, автобустар тұрғындарды Мангуш және Бердянск елдімекендеріне жеткізуі тиіс. Сондай-ақ колоннаға өз көліктерімен де адамдар қосыла алады.
Андрющенко Мариупольден Запорожьеге шығып, жолда тұрып қалған тұрғындар да бүгін 2 мамыр кеш бата я ертең, 3 мамыр таңертең Запорожьеге жетуі тиіс деді.
Соғыс уақытында мұндай ақпараттарды тәуелсіз дереккөздерден тексеру қиын.
БҰҰ Жоғарғы комиссары босқындар ісі жөніндегі басқармасының мәліметінше, 24 ақпан 1 мамыр арасында Украинадан 5 млн 539 мың адам кеткен. Олардың үш миллионы Польшаға, 826 мыңы Румынияға, 681 мыңы Ресейге шыққан.
Израиль Лавровтың еврейлер жайлы сөзінен соң Ресей елшісін министрлікке шақыртты
Израиль сыртқы істер министрлігі Ресейдің Израильдегі елшісін шақыртты деп хабарлады Рейтерс ақпарат агенттігі. Бұған Ресей сыртқы істер министрі Сергей Лавровтың италиялық телеарнаға берген сұхбатында еврейлер жайлы айтқан сөзі себеп болған.
Лавров Mediaset телеарнасына берген сұхбатында Украинаны нацизмге айыптап, мұны Украина басшысы Зеленскиймен байланыстырған.
"Зеленский еврей болса қандай нацификация болады. Қателесуім де мүмкін, бірақ Гитлерде де еврейдің қаны болған... Демек бұл жерде бәрі белгілі. Еврей халқының өзі "ең антисемиттер еврейлер" деп айтады" деген еді Лавров. (антисемизм – еврей ұлтына деген жеккөрінушілік)
Лавровтың сөзі Израильде шу туғызып, елдің сыртқы істер министрі Яир Лапид твиттерде Лавровтың айтқанын "кешірілмейтін сөз" әрі "тарихи қате" деп жазды.
"Еврейлер Холокост кезінде өз-өздерін қырған жоқ. Еврейлердің өзін антисемитизмге айыптау – еврейлерге қатысты айтылған ең жаман расизм" деген Лапид Лавровтан кешірім сұрауды талап етті.
Израиль соғыс басталғалы Ресейдің әрекетін сөккенімен Мәскеуге санкция салудан және Украинаға қару беруден бас тартып отыр. Бұл үшін Киев Израильді сынға да алған.
- Лавров италиялық телеарнаға берген сұхбатында Зеленский әскеріне берілуге бұйрық беруі тиіс деді. Ол "Ресейдің мақсаты Украина билігін алмастыру емес, "Донбасс халық республикалары" мен Ресейдің қауіпсіздігін қамтамасыз ету" деді.
- Лавров Ресей әскерінің алдында әскери әрекеттерді 9 мамырда аяқтау мақсаты жоқ деп мәлімдеді.