Қырғызстан мен Тәжікстанның ұлттық қауіпсіздік қызметінің басшылары екі ел арасындағы жанжалды бейбіт жолмен реттеу туралы хаттамаға қол қойды. Бұл жөнінде Қырғызстанның вице-премьері әрі ұлттық мемлекеттік қауіпсіздік комитетінің төрағасы Қамшыбек Тәшиев хабарлады. Ол мұны шекарада біртіндеп қалпына келіп жатқан бейбіт өмірге жасалған тағы бір қадам деп бағалады.
Тәшиевтің сөзінше, қырғыз-тәжік шекарасындағы қарулы шабуылды тергеп-тексеру үшін құрылған бірлескен комиссия 20 қыркүйектен бастап жұмысын жалғастырады.
Қырғыз-тәжік шекарасындағы қақтығыс кезінде қаза болғандарды еске алу мақсатында Қырғызстан 19 қыркүйекті аза күні деп жариялаған. Кейінгі ресми ақпараттарға қарағанда, 14-17 қыркүйекте Қырғызстанның кемі 59 адамы қаза болған, оның 40 адамы – жауынгерлер. 164 адам жараланған. Шекарадағы қырғыз ауылдарынан 140 мыңнан астам адам қауіпсіз мекенге көшірілген. Тәжікстан сыртқы істер министрлігі 41 тәжік азаматы өліп, 100-ден астам адам жараланғанын хабарлады.
Екі ел шекарасындағы жағдай 14 қыркүйекте күрт ушыққан. Екі тарап жанжал бастады деп бірін-бірі айыптаған. 16 қыркүйекте атысты тоқтату туралы бітімге келген еді, алайда атыс 17 қыркүйекте де тоқтамаған.
ПІКІРЛЕР