Прокуратура 8 қарашада Жамбыл облысы Байзақ ауданы Сарыкемер ауылында балалардың жаппай улану фактісіне байланысты тергеу басталғанын хабарлады.
Биліктің айтуынша, 7 қарашада Сарыкемер ауылындағы Киікбаев атындағы мектеп-гиназияның 46 оқушысы мен 2 мұғалімінен улану белгілері анықталып, аудандық аурухананың инфекция бөліміне әкелінген. Дәрігерлер оларды тексергеннен кейін 33 оқушы мен 2 мұғалімді ауруханаға жатқызған.
Жергілікті полиция бөлімі аталған фактіні "Санитарлық ереже немесе гигиена нормативтерін бұзу" бабы (304-бап, 1-бөлік) бойынша сотқа дейінгі тергеу амалдарының бірыңғай реестрінде тіркеген. Облыстық прокуратураның хабарлауынша, тиісті тергеу амалдары жүріп жатыр. Тергеу прокуратура бақылауында.
Байзақ аудандық орталық аурухананың бас дәрігері Жандос Рысқұлов журналистерге ауруханада 33 оқушы мен 2 мұғалім жатқанын хабарлады. Олардың барлығына "токсикоинфекцияның асқынған түрі" деген алдын ала диагноз қойылған. Бас дәрігердің айтуынша, ауруханаға түскендерден – жүректің айнуы, лоқсу, дене қызуының көтерілуі сияқты улану белгілері анықталған.
"Науқастар диагностика хаттамасына сәйкес емделіп жатыр. Жағдайы тұрақты, орташаға жақын. Ерекше шағымдары жоқ" деді ол.
Биліктің айтуынша, оқушылардан әлсіреу, лоқсу сияқты алғашқы улану белгілері 7 қараша түстен кейін байқала бастаған. Жаппай улану фактісінен кейін гимназиядағы тамақтануға жауапты "Тоқсейітов" жеке кәсіпкерлігі жұмыстан уақытша шеттетілген.