Ақ үй құны шамамен 106,5 млн доллар болатын 14 мың танк снарядтарын конгрестің қарауынсыз Израильге сатуға рұқсат беру үшін өз өкілетін пайдаланды. Бұл жөнінде АҚШ қорғаныс министрлігінің мәлімдемесіне сүйенген Reuters хабарлады.
Бұл АҚШ президент әкімшілігі конгрестен мақұлдауды өтініп отырған миллиардтаған долларлық ірі келісімнің бір бөлігі ғана. Әскери көмек пакетінде "Меркава" танктеріне арналған 45 мың снаряд бар. Аталған танкілерді Израиль Газа секторында ЕО мен АҚШ-та "террористік ұйым" деп танылған палестиналық ХАМАС тобына қарсы пайдаланып жатыр.
Reuters-тің айтуынша, Израильді қолдау туралы өтініш Америка қаруын Газа секторында пайдалануға қатысты дау өршіген шақта түсіп отыр. Көптеген ел Израильді бейбіт тұрғындарды қырды деп айыптап отыр. Ал Израиль әскері жиһадшылардың әскери инфрақұрылымына шабуыл жасағанын айтады.
Қазан айында АҚШ президенті Джо Байден Украинаға 61,4 миллиард, Израильге 14,3 миллиард көмек бөлуді конгресстен сұраған. Заң жобасын осы аптада АҚШ сенаты өткізбей тастады. Құжатқа қарсы дауыс берген республикашылдар өзге елдерге көмектесуге қарсы еместігін айтып, алайда Мексикамен шекарадағы қауіпсіздікті күшейту туралы талаптардан да бас тартуға дайын емес екенін жеткізген.
