Желтоқсанның 11-іне қараған түні Ресей әскері баллистикалық зымырандармен және камикадзе-дрондармен Киевке шабуыл жасады. Мұны Украина әуе қорғанысы хабарлады. Сегіз зымыран да атып түсірілген.
Зымыран Ресейдің Брянск облысы тұсынан атылған.
Украина әскері аннексияланған Қырымнан атылған 18 дронды да құлатқанын мәлімдеді.
Ресей зымырандарының сынықтары Киевтің оңтүстігіне құлаған. Төрт адам зардап шеккен. Біреуіне жарықшақ тиіп, аяғынан жараланған деп хабарлады қала әкімі Виталий Кличко.
Зымыран сынықтары құлаған жерде өрт шығып, жылдам өшірілген.
Ресей әскері Украинаны күн сайын атқылап отыр.
Ресей қорғаныс министрлігі тек әскери нысаналар ғана атқыланды деп есептейді. Бейбіт адамдардың өліп, тұрғын үйлер мен азаматтық инфрақұрылымның қирағаны жайлы Ресей айтқысы келмейді.
ПІКІРЛЕР