- Авторы: Руслан МЕДЕЛБЕК
Әлемдегі жағдай: Прагада Димаш Құдайбергеннің концерті болмайды
109 адамнан вирус табылған Чехия билігі ел аумағында бір ай төтенше жағдай жариялап, көпшілік қатысатын іс-шара өткізуге тыйым салды. Демек, бұған дейін наурыздың 25-і күні Прагада өтеді деп жоспарланған қазақстандық танымал әнші Димаш Құдайбергеновтің концерті де болмайды. Болгария да елде төтенше жағдай жариялады.
АҚШ-тың жеті штаты 16 наурыздан бастап екі аптаға мектептерді жапты. Португалия да 9 сәуірге дейін мектептерді, түнгі клубтардың жұмысын тоқтатты. Бельгияда, Францияда сәуірдің басына дейін мектептер, мейрамханалар, клубтар, жұмыс істемейді. Катар кинотеатрлар мен балалар ойнайтын алаңдардың жұмысын шектеді. Түркия мектептер мен университеттердегі сабақты үш аптаға тоқтатты.
Испания Каталония аймағындағы төрт қаланы карантинге жапты. Бұл елде вирус жұқтырғандар үш мыңнан асып кетті. 86 адам қаза болды.
Біртанов: Алматыда қазір төтенше жағдай жариялауға негіз жоқ
13 наурыздағы брифингте денсаулық сақтау министрі Елжан Біртанов “вирус жұқтырған екі қазақстандық жатқан Алматыда дәл қазір төтенше жағдай жариялауға негіз жоғын” айтты.
“Қазір қалада төтенше жағдай жариялауды жергілікті әкімдік шешеді. Әрине, біз олармен байланыстамыз. Бірақ дәл қазір төтенше жағдай жариялауға негіз жоқ. Егер коронавирус жұқтырғандар саны өссе, төтенше жағдай жариялануы да мүмкін” деді министр.
Министрліктің дерегінше, вирус жұқтырған екі қазақстандықтың бірі 1974 жылы, екіншісі 1984 жылы туған.
- Авторы: Мақпал МҰҚАНҚЫЗЫ
Қазақстанда қанша адам карантинде жатыр?
Қазақстанда 16 наурыздан бастап оқушылар ерте каникулға шығады. Ал студенттер толығымен онлайн оқу жүйесіне көшеді. Елде кинотеатрлар жұмысын уақытша тоқтатты. Наурыз мерекесіне арналған шаралар да өтпейді. Қазақстан билігі Қытай, Иран, Италия, Оңтүстік Корея, Германия, Франция, Испания, Швейцария, Сингапур, Гонконг, АҚШ сынды елдерден келгендерді карантинге жібереді. Денсаулық сақтау министрлігінің дерегінше, қазір Қазақстанда үш мыңға жуық адам карантинде.
