Оңтүстік Корея вирус жұққандар саны азайғанын хабарлады
BBC сайтының жазуынша, төрт апта бұрын вирус қатты тараған Оңтүстік Кореяда соңғы тәулікте 64 адамнан коронавирус табылған. Бұл соңғы бір айдағы ең төменгі көрсеткіш. Елде 8900-ден астам адамнан вирус анықталған. 111 адам көз жұмған.
Дегенмен ел билігі жайбарақаттануға болмайтынын, инфекциямен әлі ұзақ күресетінін айтып отыр.
Қырғызстанның бірқатар аймақтарында төтенше жағдай жарияланады
Қырғызстанның бірқатар аймақтарында атап айтқанда, Бішкек, Ош, Жалалабад қаласы, Ош облысының Ноокат және Кара-суу ауданы, Жалалабад облысы Сузак ауданында 25 наурыз бен 15 сәуір аралығында коронавирусқа байланысты төтенше жағдай жарияланады.
Азаттықтың Қырғыз қызметінің хабарлауынша, 24 наурызда Жалалабад қаласының негізгі көшелеріне блокбекеттер қойылып, адамдар мен автокөліктер кезекке тұрған. Қалаға кіріп-шығуға тыйым салынған. Жергілікті билік қала тұрғындарының денсаулығын қорғау мақсатында осындай шара қолдануға мәжбүр екенін айтқан.
Азық-түлік, дәрі-дәрмек тасыған көліктерді блокбекеттерден кезексіз өткізіп жатыр. Басқа жақта тұратын мемлекеттік орган қызметкерлері арнайы өткізу қағазының көмегімен өтеді.
23 наурыз күнгі дерек бойынша, Қырғызстанда 16 адамнан коронавирус табылған: 7 ер адам, 9 әйел.
Астанада түске дейін үш адамнан коронавирус табылды
Денсаулық сақтау министрлігі Нұр-Сұлтанда тағы бір адамнан коронавирус табылғанын хабарлады. Сейсенбі таңертеңнен бері қалада осымен үшінші адамнан коронавирус табылғаны хабарланып отыр.
Қазақстанда коронавирус жұққан науқастар саны 68 адамға жетті. Алматыда - 29 адам, Нұр-Сұлтанда - 35 адам, Қарағандыда - 2 адам, Алматы облысында - 1, Ақтөбе облысында 1 адам емделіп жатыр.
Ухань қаласы сәуір айында ашылады
Қытайдың мемлекеттік ақпарат құралдары вирус тарап, шамамен екі айдан астам уақыт жабық болған Қытайдың Ухань қаласы 8 сәуірде ашылады деп хабарлады. Өткен жылдың соңында дәл осы қалада алғаш рет коронавирус табылған еді. Содан бері вирус әлемге тарап, соңғы дерек бойынша, одан 16 мыңнан астам адам көз жұмған.
Бұған дейін Қытай билігі елде эпидемияның беті қайтқанын, негізінен шетел азаматтарынан вирус табылып жатқанын хабарлаған.
China Daily сайтының жазуынша, Хубей провинциясының қалған бөлігінде 25 наурыздан бастап жолдар ашылады.