Өзбекстанда коронавирус жұқтырғандар саны 60-қа жетті
26 наурыз таңертеңгі дерек бойынша, Өзбекстанда коронавирус жұқтырғандар саны 60-қа жетті.
Соңғы рет коронавирус шетелден келген азаматтармен байланыста болған үш адам және Стамбулдан оралған Наманган тұрғынынан табылған. Қазір науқастар инфекциялық ауруханаларда жатыр.
Нұр-Сұлтан мен Алматыда тағы бірнеше адамнан коронавирус табылды
Қазақстан денсаулық сақтау министрлігі 26 наурызда таңертең Нұр-Сұлтанда - бес адам, Алматыда екі адамнан коронавирус табылғанын хабарлады.
Осылайша коронавирус жұқтырғандар саны тағы жеті адамға көбейіп, жалпы саны 88 адам болды. Алматыда - 34 адам, Нұр-Сұлтанда - 44 адам, Қарағандыда - екі адам, Шымкентте - екі адам, Алматы облысында - бір адам, Ақтөбе облысында - бір адам, Жамбыл облысында - бір адам, Солтүстік Қазақстан облысында бір адам емделіп жатыр.
25 наурызда Қазақстан үкіметі екі адам дертінен айыққанын хабарлаған.
Қазақстанда коронавирусқа байланысты 15 сәуірге дейін төтенше жағдай. 19 наурыздан бастап Алматы мен Нұр-Сұлтан қалалары карантинге көшті.
АҚШ-тағы Джон Хопкинс университетінің дерегінше, қазір әлемде 470 мыңнан астам адам вирус жұқтырды. 21 мыңнан астам адам қаза болды. 114 мыңнан астам адам дертінен айықты.
Алматыда кешкі 19.00-де қоғамдық көлік тоқтайды
Алматыда төтенше жағдай режиміне байланысты құрылған шұғыл штаб қоғамдық көліктердің жұмыс сағатын 19.00-ге дейін қысқартты деп хабарлады жергілікті БАҚ.
26 наурыздан бастап қаладағы барлық автобус, троллейбустар, метро кешкі 19.00-ге дейін істейді. Әдетте қоғамдық көлік түнгі 24.00-ге дейін істейтін. Қалада карантин жарияланғаннан кейін қоғамдық көліктердің жұмыс істеу уақыты 21.00-ге дейін қысқарған еді. Енді тағы екі сағатқа қысқарып отыр.
Алматы - коронавирус жұққан адамдар саны жағынан Қазақстан бойынша Нұр-Сұлтаннан кейін екінші орында тұр. 19 наурыздан бастап екі қалада карантин жарияланған.
Таиланд коронавирусқа байланысты тұтас жабылады
Таиланд коронавирустың таралуын тоқтату үшін 26 наурыздан бастап елге кіріп-шығуды толық тоқтатады. Бейсенбі күннен бастап әуежай, теңіз және шекарадағы бекеттер жабылады. Төтенше жағдай жөніндегі мемлекеттік комитеттің коронавирусқа байланысты ерекше бұйрығы қабылданғанға дейін шектеулер күшінде болады.
Төтенше жағдай режимі 30 сәуірге дейін созылады. Осы уақыт аралығында стадиондар, сауда нысандары, ойын-сауық орталықтары, кинотеатрлар, бар, мейрамхана, жағажайлар жұмысын тоқтатады. Азық-түлік дүкендері ғана істейді.
26 наурыздан бастап премьер-министр немесе арнайы құзырлы органның рұқсатын алған адамдар ғана елге кіре алады. Дипломаттар мен олардың отбасы мүшелері, халықаралық ұйым қызметкерлері, әуе және кеме экипажының мүшелеріне ғана елден шығуға рұқсат. Бұған қоса, Таиландқа шұғыл жүк жеткізген жұмысшылар, халықаралық келісімге сәйкес белгілі бір тапсырманы орындаумен айналысқан сыртқы істер министрлігінің хаты бар қызметкерлер елден шыға алады.
Соңғы дерек бойынша, Таиландта 934 адамға коронавирус жұққан. Төрт науқас қайтыс болды. 70 адам айықты.
ПІКІРЛЕР