Әлемдегі жағдай. Испанияда бір күнде 823 адам қайтыс болды
Испания денсаулық сақтау министрі 24 сағатта коронавирустан 823 адам қайтыс болғанын, елде барлығы 5690 адам көз жұмғанын хабарлады. Испанияда 72248 адам вирус жұқтырды. Қазір Испания – коронавирустың эпицентріне айналған елдердің бірі.
Иранда 24 сағатта 3000 адамнан вирус табылды. Қазір бұл елде 35400 адам дертке шалдыққан. Қайтыс болғандар – 2517 адам.
Түркияда бір апта ішінде вирус жұқтырғандар 5698 адамға жетті. 92 адам көз жұмды. Ел билігі пойыздарды, автобустарды, халықаралық рейстерді тоқтатып жатыр. Тұрғындардың басқа қалаға баруына тыйым салынды.
Ұлыбританияда коронавирустан көз жұмғандар мыңнан асты.
Вирус шыққан Қытайдың Ухань қаласы екі ай карантиннен кейін жартылай ашылды. Халық қалаға кіре алады. Бірақ қаладан шығуға әлі рұқсат жоқ.
АҚШ-тағы Джон Хопкинс университетінің дерегінше, әлемде 615 адамнан вирус табылды. 28717 адам қайтыс болды. 135735 адам дерттен айықты.
Қарағанды облысында үш адамнан, Атырау облысында бір адамнан вирус табылды
Қазақстан денсаулық сақтау министрлігінің 28 наурыз 20.28-дегі дерегі бойынша, Қарағанды облысында - үш адамнан, Атырау облысында бір адамнан коронавирус табылды.
Қазір Қазақстанда 208 адам вирус жұқтырды. Елде 15 адам Covid-19 дертінен айықты. 26 наурызда Ақмола облысы Қосшы ауылында 64 жастағы әйел адам коронавирустан қайтыс болған. Оның вирус жұқтырғаны қайтыс болған соң белгілі болған.
Коронавирус деген не? Бүлдіршіндерге түсіндіреміз
Бұл видео 3-8 жастағы балаларға арналған. Бала тілімен үйде отыру не үшін маңызды екенін бүлдіршіндерге бірге түсіндірелік.
Төтенше жағдай кезінде беташар жасаған тұрғын бес тәулікке қамалды
Жамбыл облысында төтенше жағдай кезінде бешатар ұйымдастырған 30 жастағы тұрғын бес тәулікке қамалды. Оған “Төтенше жағдай ережесін бұзды” деген айып тағылды. Ал полиция беташар жасаған асабаға ескерту жасаған.
Осыған дейін желіде "Коронавирус кет, кет" әніне билеп, той өткізіп жатқан видео тараған.
